[CPD Classification 2.5.14]
\n[PTS Vol Bu - ] [\z Bv /] [\f I /]
\n[BJT Vol Bu - ] [\z Bv /] [\w I /]
\n[BJT Page 170] [\x 170/]
\n[PTS Page 048] [\q  48/]
\n 
Suttantapiṭake khuddakanikāye
\nBuddhavaṃsapāḷi

Namo tassa bhagavato arahato sammāsambuddhassa
\n17. Tissa buddhavaṃso

1. Siddhattha aparena assamo appaṭipuggalo
\nAnantatejo1 amitayaso tisso lokagganāyako.

2. Tama’ndhakāraṃ vidhametvā obhāsetvā sadevakaṃ2
\nAnukampako mahā vīro loke uppajji cakkhumā.

3. Tassā’pi atulā iddhi atulaṃ sīlaṃ samādhi ca
\nSabbattha pāramiṃ gantvā dhammacakkaṃ pavattayī.

4. So buddho dasasahassimhi viññāpesi giraṃ suciṃ
\nKoṭisatāni abhisamiṃsu paṭhame dhammadesane.

5. Dutiyo navutikoṭīnaṃ3 tatiyo saṭṭhikoṭiyo4
\nBandhanāto5 pamocesi 6 sampatte naramarū tadā.

6. Sannipātā tayo āsuṃ tisse lokagganāyake
\nKhīṇāsavānaṃ vimalānaṃ santacittāna tādinaṃ.
\n7. Khīṇāsavasatasahassānaṃ7 paṭhamo āsi samāgamo
\nNavuti sata sahassānaṃ dutiyo āsi samāgamo.
\n[PTS Page 049] [\q  49/]
\n8. Asīti satasahassānaṃ tatiyo āsi samāgamo
\nKhīṇāsavānaṃ vimalānaṃ pupphitānaṃ vimuttiyā.

9. Ahaṃ tena samayena sujāto nāma khattiyo
\nMahābhogaṃ chaḍḍhayitvā pabbajiṃ isipabbajaṃ.

10. Mayi pabbajite sante uppajji lokanāyako
\nBuddho’ti saddaṃ sutvāna pīti me upapajjatha.

11. Dibbaṃ mandāravaṃ pupphaṃ padumaṃ pāricchattakaṃ
\nUbho hatthehi paggayha dhunamāno upāgamiṃ.

1. Anantasīlo-mavi. [PTS] 2. Sadevake-mavi. 3. Dutiye navutikoṭiyo-sīmu.
\n4. Tatiyo satta koṭiyo-sīmu. 5. Bandhanāso-sīmu. 6. Vimocesi-[PTS.]
\n7. Khīṇāsava sahassānaṃ-sīmu.
\n 

[BJT Page 172] [\x 172/]

12. Cātuvaṇṇaparivutaṃ tissaṃ lokagganāyakaṃ
\nTama’haṃ pupphaṃ gahetvāna matthake dhārayiṃ jinaṃ.

13. So’pi buddho1 vyākāsi janamajjhe nisīdiya
\nDvenavute ito kappe ayaṃ buddho bhavissati.

14. Ahū kapilavhayā rammaṃ nikkhamitvā tathāgato
\nPadhānaṃ padahitvāna katvā dukkarakārikaṃ.

15. Ajapālarukkhamūlamhi nisīditvā tathāgato
\nTatthapāyāsamaggayha nerañjaramupehitī.

16. Nerañjarāya tīramhi pāyāsaṃ ādāya so jino
\nPaṭiyattavaramaggena bodhimūlamhi ehiti.

17. Tato padakkhiṇaṃ katvā bodhimaṇḍaṃ anuttaro
\nAssattharukkhamūlamhi bujjhissati mahāyaso.

18. Imassa janikā mātā māyā nāma bhavissati
\nPitā suddhodano nāma ayaṃ hessati gotamo.
\n19. Kolito upatisso ca aggā hessanti sāvakā
\nĀnando nāmu’paṭṭhāko upaṭṭhissati taṃ jinaṃ.

20. Khemā uppalavaṇṇā ca aggā hessanti sāvikā
\nBodhi tassa bhagavato assattho’ti pavuccati.

21. Citto ca hatthāḷavako aggā hessantu’paṭṭhakā
\nUttarā nandamātā ca aggā hessantu’paṭṭhikā
\nĀyu vassasataṃ tassa gotamassa yasassino.

22. Idaṃ sutvāna vacanaṃ asamassa mahesino
\nĀmoditā naramarū buddhabījaṅkuro ayaṃ.

23. Ukkuṭṭhisaddaṃ vattenti apphoṭenti hasanti ca
\nKatañjalī namassanti dasasahassī sadevakā.

1. Tadā-sīmu.
\n[BJT Page 174] [\x 174/]
\n24. Yadi’massa lokanāthassa virajjhissāma sāsanaṃ
\nAnāgatamhi addhāne hessāma sammukhā imaṃ.

25. Yathā manussā nadiṃ tarantā paṭititthaṃ virajhiya
\nHeṭṭhā titthe gahetvāna uttaranti mahānadiṃ.

26. Eva’meva mayaṃ sabbe yadi muñcāmi’maṃ jinaṃ
\nAnāgatamhi addhāne hessāma sammukhā imaṃ.

27. Tassā’pi vacanaṃ sutvā bhīyyo cittaṃ pasādayiṃ
\nUttariṃ vatamadhiṭṭhāsiṃ dasapāramīpūriyā.
\n28. Khemakaṃ nāma nagaraṃ janasandho nāma khattiyo
\nPadumā nāma janikā tissassa ca mahesino.

29. Sattavassasahassāni agāramajjhaso vasī
\nGuhā selanāri nisabhā tayo pāsāda muttamā.

30. Samatiṃsa sahassāni nāriyo samalaṅkatā
\nSubhaddā nāma sā nāri ānando nāma atrajo.

31. Nimitte caturo disvā assayānena nikkhami
\nAnūnakaṃ aṭṭhamānaṃ padhānaṃ padahī jino.

32. Brahmunā yācito santo tisso lokagganāyako
\nVatti cakkaṃ mahāvīro yasavatīdāyamuttame.

33. Brahmadevo ca udayo ca ahesuṃ aggasāvakā
\nSamaṅgo1 nāmupaṭṭhāko tissassa ca mahesino.

34. Phussā ce’vā ca sudattā ca ahesuṃ aggasāvikā
\nBodhi tassa bhagavato asano’ti pavuccati.

35. Sambalo ca sirī 2 ceva ahesuṃ aggupaṭṭhakā
\nKisāgotamī upasenā ahesuṃ aggupaṭṭhikā.

1. Samāho-mavi, samago-syā, sumaṅgalo. 2. Sirimā-machasaṃ. -Sīmu.
\n 

[BJT Page 176] [\x 176/]

36. So’pi buddho saṭṭhiratano ahu uccattane1 jino
\nAnupamo asadiso himavā viya dissati.

37. Tassā’pi atulatejassa āyu āsi anuttaro
\nVassasatasahassāni loke aṭṭhāsi cakkhumā.

38. Uttamaṃ pavaraṃ seṭṭhaṃ anubhātvā maihāyasaṃ
\nJalitvā aggikkhandho’va nibbuto so sasāvako.
\n[PTS Page 050] [\q  50/]
\n39. Valāhakova anilena suriyena viya ussāvo
\nAndhakārova dīpena nibbuto so sasāvako.

40. Tisso jinavaro buddho nandārāmamhi nibbuto
\nTatthe’va tassa jinathūpo tīṇi yojanamussito’ti.

Tissa buddhavaṃso sattarasamo.

1. Uccatarena - sīmu.
\n