[CPD Classification 2.5.14]
\n[PTS Vol Bu - ] [\z Bv /] [\f I /]
\n[BJT Vol Bu - ] [\z Bv /] [\w I /]
\n[BJT Page 68] [\x  68/]
\n[PTS Page 021] [\q  21/] 
\n 
Suttantapiṭake khuddakanikāye
\nBuddhavaṃsapāḷi

Namo tassa bhagavato arahato sammāsambuddhassa
\n3. Maṅgala buddhavaṃso

1. Koṇḍaññassa aparena maṅgalo nāma nāyako,
\nTamaṃ loke nihantvāna, dhammukka’mabhidhārayi. 1

2. Atulā’si 2 pahā tassa, jineha’ññehi uttariṃ,
\nCanda suriyappabhaṃ3 hantvā dasa sahassī virocati. 4

3. So’pi buddho pakāsesi, caturo saccavaruttame 5
\nTe te sacca rasaṃ pītvā, vinodenti mahātamaṃ.

4. Patvāna bodhi’matulaṃ, paṭhame dhammadesane,
\nKoṭisatasahassānaṃ, paṭhamā’bhisamayo6 ahu.

5. Surindadevabhavane buddho dhammamadesayi, 7
\nNavakoṭisahassānaṃ, 8 dutiyā’bhisamayo ahu.

6. Yadā sunando cakkavatti, sambuddhaṃ upasaṅkami,
\nTadā ahani sambuddho, dhammabheriṃ varuttamaṃ. 9

7. Sunandassā’nucarā janatā, tadā’suṃ navutikoṭiyo,
\nSabbe’pi te niravasesā, ahesuṃ ehibhikkhukā.

8. Sannipātā tayo āsuṃ, maṅgalassa mahesino,
\nKoṭisata sahassānaṃ, paṭhamo āsi samāgamo.

9. Dutiyo koṭisahassānaṃ, tatiyo navuti koṭinaṃ,
\nKhīṇāsavānaṃ vimalānaṃ, tadā āsi samāgamo.

1. Dhammokkamabhidhārayī-bahūsu. 2. Atulāpi-sīmu. 3. Candasūriyapahaṃ-machasaṃ.
\nDhammokkaṃ abhidhārayi-sīmu. 4. Virocayīti-sīmu. 5. Catusacca varuttame-sīmu.
\nCattāro saccavaruttame-pu. 6. Dhammābhisamayo-machasaṃ. 7. Dhamme adesayi-manupa, yadā buddhopakāsayi
\n8. Tadākoṭi sahassānaṃ-machasaṃ manupa, 9. Varuttamo manupa.
\n 

[BJT Page 70] [\x  70/]

10. Ahaṃ tena samayena surucī nāma brāhmaṇo,
\nAjjhāyako mantadharo tiṇṇaṃ vedānaṃ pāragu.
\n[PTS Page 022] [\q  22/]
\n11. Tamahaṃ upasaṅkamma, saraṇaṃ gantvāna satthuno,
\nSambuddhapamukhaṃ saṅghaṃ gandhamālena pūjayiṃ
\nPūjetvā gandhamālena gavapānena tappayiṃ.

12. So’pi maṃ buddho vyākāsi maṅgalo dipaduttamo
\nAparimeyye ito1 kappe ayaṃ buddho bhavissati.

13. Ahu kapilavhayā rammā nikkhamitvā tathāgato
\nPadhānaṃ padahitvāna katvā dukkarakārikaṃ. 2

14. Ajapālarukkhamūlasmiṃ nisīditvā tathāgato
\nTattha pāyāsamaggayha nerañjaramupehiti.

15. Nerañjarāya tīramhi pāyāsaṃ ādāya so jino
\nPaṭiyattavaramaggena bodhimūlamhi ehiti.

16. Tato padakkhiṇaṃ katvā bodhimaṇḍaṃ anuttaro
\nAssattharukkhamūlamhi bujjhissati mahāyaso.

17. Imassa janikā mātā māyā nāma bhavissati
\nPitā suddhodano nāma ayaṃ hessati gotamo.

18. Kolito upatisso ca aggā hessanti sāvakā
\nĀnando nāmu paṭṭhāko upaṭṭhissati taṃ jinaṃ.

19. Khemā uppalavaṇṇā ca aggā hessanti sāvikā
\nBodhi tassa bhagavato, assattho’ti pavuccati.

20. Citto ca hatthāḷavako aggā hessantu’paṭṭhakā
\nUttarā nanda mātā ca aggā hessantu’paṭṭhikā
\nĀyu vassa sataṃ tassa, gotamassa yasassino.

21. Idaṃ sutvāna vacanaṃ asamassa mahesino
\nĀmoditā naramarū buddha bījaṅkuro ayaṃ.
\n1. Aparimeyyato-machasaṃ. 2. Dukkarakāriyaṃ-[PTS]

[BJT Page 72] [\x  72/]

22. Ukkuṭṭhi saddaṃ vattenti apphoṭenti 1 hasanti ca
\nKatañjalī namassanti dassasahassī sadevakā.

23. Yadi’massa lokanāthassa virajjhissāma sāsanaṃ
\nAnāgatampi addhāne hessāma sammukhā imaṃ.

24. Yathā manussā nadiṃ tarantā paṭititthaṃ virajjhiya
\nHeṭṭhā titthe gahetvāna uttaranti 2 mahānadiṃ.

25. Eva’meva mayaṃ sabbe yadi muñcāmi’maṃ jinaṃ
\nAnāgatamhi addhāne hessāma sammukhā imaṃ.

26. Tassā’pi vacanaṃ sutvā bhiyyo cittaṃ pasādayiṃ
\nUttariṃ2 vatamadhiṭṭhāsiṃ dasa pārami pūriyā.

27. Tadā pīti 3 manubrūhanto sambodhivara pattiyā
\nBuddhe datvāna maṃ gehaṃ pabbajiṃ4 tassa santike.

28. Suttantaṃ vinayañcā’pi navaṅgaṃ satthusāsanaṃ
\nSabbaṃ pariyāpuṇitvāna 5 sohayiṃ6 jinasāsanaṃ.

29. Tatthappamatto viharanto brahmaṃ bhāvetva7 bhāvanaṃ
\nAbhiññā pāramiṃ gantvā brahmalokamagacchahaṃ. 8

30. Nagaraṃ uttaraṃ nāma 9 uttaro nāma khattiyo,
\nUttarā nāma janikā maṅgalassa mahesino.

31. Nava vassasahassāni agāra majjha so vasi
\nYasavā sucimā sirimā’ tayo pāsādamuttamā.
\n32. Samatiṃsa sahassāni’ nāriyo samalaṅkatā
\nYasavatī nāma nārī sīvalo nāma atrajo.

1. Appotenti-machasaṃ. 2. Uttari-manupa. 3. Tadāpi-manupa. 4. Pabbaji-manupa.
\n5. Pariyāpuṇitvā-machasaṃ 6. Sobhati-manupa. 7. Bhāvetvā-manupa, machasaṃ.
\n8. Brahmaloka agacchihaṃ-manupa. 9. Uttaraṃ nāma nagaraṃ machasaṃ, manupa.
\n10. Vatatamadhiṭhāsiṃ-syā.
\n 

[BJT Page 74] [\x  74/]

33. Nimitte caturo disvā assa yānena nikkhami,
\nAnūnakaṃ aṭṭhamāsaṃ1 padhānaṃ padahī jino.

34. Brahmunā yācito satto maṅgalo lokanāyako2
\nVatti cakkaṃ mahāvīro vane siri varuttame.

35. Sudevo dhammaseno ca ahesuṃ aggasāvakā,
\nPālito nāmupaṭṭhāko maṅgalassa mahesino.

36. Sīvalā3 ca asokā ca ahesuṃ aggasāvikā,
\nBodhi tassa bhagavato nāgarukkhoti vuccati.

37. Nando ceva visākho4 ca ahesuṃ aggu’paṭṭakā,
\nAnulā ceva sutanā ca ahesuṃ aggu’paṭṭhikā.

38. Aṭṭhāsīti ratanāni accuggato mahāmunī,
\nTato niddhāvanti 5 raṃsī anekasatasahassiyo.

39. Navutivassasahassāni 6 āyu vijjati tāvade
\nTāvatā tiṭṭhamāno so tāresi janataṃ bahuṃ.

40. Yathā’pi sāgare ūmi na sakkā tā gaṇetuye,
\nTathe’va sāvakā tassa na sakkā te gaṇetuye.
\n[PTS Page 023] [\q  23/]
\n41.Yāva aṭṭhāsi 7 sambuddho maṅgalo lokanāyako,
\nTa tassa sāsane atthi saṃkilesa 8 maraṇaṃ tadā.

42. Dhammukkaṃ9 dhārayitvāna santāretvā mahājanaṃ,
\nJalitvā10 dhumaketūva nibbuto so mahāyaso. 11

43. Saṅkhārānaṃ sabhāvantaṃ dassayitvā sadevake, jalitvā aggikkhandho’va suriyo atthaṃgato yathā.

44. Uyyāne vessare12 nāma buddho nibbāyi maṅgalo,
\nTatthe’va tassa jinathūpo tiṃsa yojanamuggato’ti.

Maṅgala buddhavaṃso tatiyo.

1. Anunakaṭṭhamāsāni-manupa
\n2. Maṅgalo nāma nāyako-ma, machasaṃ. Anunaaṭṭhamāsāni-machasaṃ, syā.
\n3. Sīlā-manupa.
\n4. Visākhā-manupa.
\n5. Nidhāvati-mavi.
\n6. Navutivasasatasahassāni-manupa.
\n7. Yāvadaṭṭhāsi-sīmu.
\n8. Sakilesa-machasaṃ.
\n9. Dhamme kkaṃ-machasaṃ, syā, sīmu.
\n10. Jāletvā-sīmu.
\n11. Sasāvako-sīmu.
\n12. Vasasatarā-ma, yevatanā-manupa.Yevatano-manupa.
\n 
\n