[CPD Classification 2.5.14]
\n[PTS Vol Bu - ] [\z Bv /] [\f I /]
\n[BJT Vol Bu - ] [\z Bv /] [\w I /]
\n[BJT Page 60] [\x  60/]
\n[PTS Page 019] [\q  19/]

Suttantapiṭake khuddakanikāye
\nBuddhavaṃsapāḷi

Namo tassa bhagavato arahato sammāsambuddhassa
\n2. Koṇḍañña buddhavaṃso


\n 

1. Dīpaṅkarassa aparena koṇḍañño nāma nāyako
\nAnantatejo amitayaso appameyyo durāsado

2. Dharaṇupamo1 khamanena sīlena sāgarūpamo
\nSamādhinā merūsamo2 ñāṇena gaganūpamo.

3. Indriyabalabojjhaṅga - maggasaccappakāsanaṃ
\nPakāsesi sadā buddho hitāya sabbapāṇinaṃ

4. Dhammacakkaṃ pavattente 3 koṇḍaññe lokanāyake
\nKoṭisatasahassānaṃ paṭhamābhisamayo ahu.

5. Tato parampi desente naramarūnaṃ samāgame
\nNavutikoṭisahassānaṃ dutiyābhisamayo ahu.

6. Titthiye abhimaddanto yadā dhammamadesayi
\nAsītikoṭisahassānaṃ dhammābhisamayo4 ahū.

7. Sannipātā tayo āsuṃ koṇḍaññassa mahesino
\nKhiṇāsavānaṃ vimalānaṃ santacittāna tādinaṃ.

8. Koṭisatasahassānaṃ paṭhamo āsi samāgamo
\nDutiyo koṭisahassānaṃ tatiyo navutikoṭinaṃ.

9. Ahaṃ tena samayena vijitāvī nāma khattiyo
\nSamuddaṃ antamantena 5 issariyaṃ6 vattayāmahaṃ.

10. Koṭisatasahassānaṃ vimalānaṃ mahesinaṃ
\nSaha lokaggānāthena paramannena tappayiṃ.

1. Dharaṇūpamo so-sīmu, syā. 2. Merūpamo-machasaṃ, syā. 3. Dhammacakkappavattane-mavi. 4. Tatiyābhisamayo-machasaṃ, syā. 5. Samudda antamantena-syā. 6. Issaraṃ-sīmu.
\n 

[BJT Page 62] [\x  62/]

11. So’pi maṃ buddho vyākāsi koṇḍañño lokanāyako
\nAparimeyye ito1 kappe buddho loke bhavissati.

12. Ahu kapilavhayā rammā nikkhamitvā tathāgato
\nPadhānaṃ padahitvāna katvā dukkarakārikaṃ.

13. Ajapālarukkhamūlasmiṃ nisīditvā tathāgato
\nTattha pāyāsamaggayha nerañjaramupehiti.

14. Nerañjarāya tīramhi pāyāsaṃ ādāya so jino
\nPaṭiyattavaramaggena bodhimūlamhi ehiti.

15. Tato padakkhiṇaṃ katvā bodhimaṇḍaṃ anuttaro
\nAssattharukkhamūlamhi bujjhissati mahāyaso.

16. Imassa janikā mātā māyā nāma bhavissati
\nPitā suddhodano nāma ayaṃ hessati gotamo.

17. Kolito upatisso ca aggā hessanti sāvakā
\nĀnando nāmupaṭṭhāko upaṭṭhissati taṃ jinaṃ.

18. Khemā uppalavaṇṇā ca aggā hessanti sāvikā
\nBodhi tassa bhagavato assattho’ti pavuccati.
\n[PTS Page 020] [\q  20/]
\n19. Citto ca hatthāḷavako aggāhessantupaṭṭhakā
\nUttarā nandamātā ca 2 aggā hessantupaṭṭhikā.
\nĀyu vassasataṃ tassa gotamassa yasassino.

20. Idaṃ sutvāna vacanaṃ asamassa mahesino āmoditā naramarū buddhabījaṅkuro ayaṃ.

21. Ukkuṭṭhīsaddā vattenti apphoṭenti hasanti ca
\nKatañjalī namassanti dasasahassī sadevakā.

22. Yadimassa lokanāthassa virajjhissāma sāsanaṃ
\nAnāgatamhi addhāne hessāma sammukhā imaṃ.

1. Aparimeyyato- machasaṃ. 2. Nandamātā ca uttarā-machasaṃ.
\n 

[BJT Page 64] [\x  64/]

23. Yathā manussā nadiṃ tarantā paṭititthaṃ virajjhiya
\nHeṭṭhā titthe gahetvāna uttaranti mahānadiṃ.

24. Evameva mayaṃ sabbe yadi muñcāmimaṃ jinaṃ
\nAnāgatamhi addhāne hessāma sammukhā imaṃ.

25. Tassāhaṃ vacanaṃ sutvā bhiyyo cittaṃ pasādayiṃ
\nTameva atthaṃ sādhento mahārajjaṃ jine adaṃ
\nMahārajjaṃ vajitvāna pabbajiṃ tassa santike.

26. Suttantaṃ vinayañcā’pi navaṅgaṃ satthusāsanaṃ
\nSabbaṃ pariyāpuṇitvāna sohayiṃ jinasāsanaṃ.

27. Tatthappamatto viharanto nisajjaṭṭhānacaṅkame
\nAbhiññāpāramiṃ1 gantvā bramhalokamagacchahaṃ.

28. Nagaraṃ rammavatī nāma sunando nāma khattiyo
\nSujātā nāma janikā koṇḍaññassa mahesino.

29. Dasavassasahassāni agāramajjhaso vasī
\nSuci suruci subho ca tayo pāsādamuttamā2

30. Tīṇi satasahassāni nāriyo samalaṅkatā
\nRucidevī nāma nārī vijitaseno nāma atrajo.

31. Nimitte caturo disvā rathayānena nikkhami
\nAnūnadasamāsāni padhānaṃ padahī jino.

32. Brahmunā yācito santo koṇḍaññe dipaduttamo 3
\nVattī cakkaṃ mahāvīro devānaṃ nagaruttame.

33. Bhaddo ceva subhaddo ca ahesuṃ aggasāvakā
\nAnuruddho nāmupaṭṭhāko koṇḍaññassa mahesino.

1. Abhiññāsu pāramī-mavi. 2. Pāsādavaramuttamā-sīmu. 3. Dvīpaduttamo-machasaṃ.
\n 

[BJT Page 66] [\x  66/]

34. Tissā ca upatissā ca ahesuṃ aggasāvikā
\nSālakalyāṇiko bodhi koṇḍaññassa mahesino.

35. Soṇo ca upasoṇo ca ahesuṃ aggupaṭṭhakā
\nNandā ceva sirimā ca ahesuṃ aggupaṭṭhikā.
\n36. So aṭṭhāsīti hatthāni accuggato mahāmunī
\nSobhati 1 uḷurājāva suriyo majjhantike 2 yathā.

37. Vassasatasahassāni āyu vijjati tāvade
\nTāvatā tiṭṭhamāno so tāresi janataṃ bahuṃ.
\n[PTS Page 021] [\q  21/]
\n38. Khīṇāsavehi vimalehi vicittā āsi medinī
\nYathāhi gaganaṃ uḷuhi evaṃ so upasobhatha.

39. Tepi nāgā appameyyā asaṃkhobhā durāsadā
\nVijjupātaṃca dassetvā nibbutā te mahāyasā.

40. Sā ca atuliyā jinassa iddhiñāṇaparibhāvito ca samādhi
\nSabbaṃ samantarahitaṃ nanu rittā sabbasaṅkhārā’ti.

41. Koṇḍañño pavaro buddho candārāmamhi nibbuto
\nTattheva cetiyo citto sattayojanamussito’ti.

Koṇḍañña buddhavaṃso dutiyo.

1. Sobhate- machasaṃ.
\n2. Majjhantike-machasa.
\n