[CPD Classification 2.5.13]
\n[PTS Vol Ap 2 ] [\z Ap /] [\f IIa /]
\n[BJT Vol Ap 2 ] [\z Ap /] [\w IIa /]
\n[BJT Page 220] [\x 220/]
\n[PTS Page 433] [\q 433/]

Suttantapiṭake khuddakanikāye
\nApadānapāḷi
\nDutiyo bhāgo

Namo tassa bhagavato arahato sammāsambuddhassa.
\nTikiṅkaṇipupphiyavaggo

 
\n491. Tikiṅkaṇipupphiyattherāpadānaṃ

5249. Kaṇikāraṃva jotantaṃ nisinnaṃ pabbatantare,
\nAddasaṃ virajaṃ buddhaṃ vipassiṃ lokanāyakaṃ.

5250. Tīṇi kiṅkaṇipupphāni paggayha abhiropayiṃ,
\nSambuddhambhipūjetvā gacchāmi dakkhiṇāmukho.

5251. Tena kammena sukatena cetanāpaṇidhīhi ca,
\nJahitvā mānusaṃ dehaṃ tāvatiṃsamagacchahaṃ.

5252. Ekanavute ito kappe yaṃ buddhambhipūjayiṃ,
\nDuggatiṃ nābhijānāmi buddhapūjāyidaṃ phalaṃ.

5253. Kilesā [PTS Page 434] [\q 434/]      jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5254. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5255. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā tikiṅkaṇipupphiyo thero imā gāthāyo abhisitthāti.

Tikiṅkaṇipupphiyattherassa apadānaṃ paṭhamaṃ.

492. Paṃsukūlapujakattherāpadānaṃ

5256. Himavantassa avidūre udaṅgaṇo nāma pabbato,
\nTatthaddasaṃ paṃsukūlaṃ dumaggamhi vilambitaṃ.

5257. Tīṇi kiṅkaṇipupphāni ocinitvānahaṃ tadā,
\nHaṭṭho haṭṭhena cittena paṃsukūlaṃ apūjayiṃ.

5258. Tena kammena sukatena cetanāpaṇidhīhi ca,
\nJahitvā mānusaṃ dehaṃ tāvatiṃsamagacchahaṃ.

1. Satāni dve honti gāthā, machasaṃ.

[BJT Page 222] [\x 222/]

5259. Ekanavute ito kappe yaṃ kammamakarīṃ tadā,
\nDuggatiṃ nābhijānāmi pujetvā arahaddhajaṃ.

5260. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5261. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5262. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā paṃsukūlapūjako thero imā gāthāyo abhisitthāti.

Paṃsukūlapujakattherassa apadānaṃ dutiyaṃ.

493. Koraṇḍapupphiyattherāpadānaṃ

5263. Vanakammiko pure āsiṃ pitupitāmahenahaṃ1,
\nPasumārena jīvāmi kusalaṃ me na vijjati.

5264. Mama āsayasāmantā tisso lokagganāyako,
\nTīṇi padāni2 dassesi anukampāya cakkhumā.

5265. Akkante ca pāde disvā tissanāmassa satthuno,
\nHaṭṭho haṭṭhena cittena pāde cittaṃ pasādayiṃ.

5266. Koraṇḍaṃ pupphitaṃ disvā pādapaṃ dharaṇiruhaṃ,
\nSakosakaṃ gahetvāna padaseṭṭhamapūjayiṃ3.

5267. Tena [PTS Page 435] [\q 435/]      kammena sukatena cetanāpaṇidhīhi ca,
\nJahitvā mānusaṃ dehaṃ tāvatiṃsamagacchahaṃ.

5268. Yaṃ yaṃ yonupapajjāmi devattaṃ atha mānusaṃ,
\nKoraṇḍakacchavī4 homi passabhāso5 bhavāmahaṃ.

5269. Dvenavute ito kappe yaṃ kammamakariṃ tadā,
\nDuggatiṃ nābhijānāmi padapūjāyidaṃ phalaṃ.

5270. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

1. Pitumātumatenahaṃ, machasaṃ.
\n2. Padāni tīṇi, machasaṃ.
\n3. Padaseṭṭhe apūjayiṃ, sīmu.
\n4. Koraṇḍakachavi, machasaṃ.
\n5. Suppabhāso, machasaṃ.

Piṭava: 224

5271. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5272. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā koraṇḍapupphiyo thero imā gāthāyo abhisitthāti.

Koraṇḍapupphiyattherassa apadānaṃ tatiyaṃ.

494. Kiṃsukapupphiyattherāpadānaṃ

5273. Kiṃsukaṃ pupphitaṃ disvā paggahetvāna añjaliṃ,
\nBuddhaseṭṭhaṃ saratvāna ākāse abhipūjayiṃ.

5274. Tena kammena sukatena cetanā paṇidhīhi ca,
\nJahitvā mānusaṃ dehaṃ tāvatisamagacchahaṃ.

5275. Ekatiṃse ito kappe yaṃ kammamakariṃ tadā,
\nDuggatiṃ nābhijānāmi buddhapūjāyidaṃ phalaṃ.

5276. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5277. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5278. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā kiṃsukapupphiyo thero imā gāthāyo abhisitthāti.

Kiṃsukapupphiyattherassa apadānaṃ catutthaṃ.

495. Upaḍḍhadussadāyakattherāpadānaṃ

5279. Padumuttarassa bhagavato sujāto nāma sāvako,
\nPaṃsukūlaṃ gavesanto saṃkāre caratī1 tadā,

5280. Nagare haṃsavatiyā paresaṃ bhatako ahaṃ,
\nUpaḍḍhadussaṃ datvāna sirasā abhivādayiṃ.

5281. Tena kammena sukatena cetanāpaṇīdhihi ca,
\nJahitvā mānusaṃ dehaṃ tāvatiṃsamagacchahaṃ.

1. Carate, machasaṃ.

[BJT Page 226] [\x 226/]

5282. Tettiṃsakkhattuṃ [PTS Page 436] [\q 436/]      devindo devarajjamakārayi,
\nSattasattatikkhattuñca cakkavattiṃ ahosahaṃ.

5283. Padesarajjaṃ vipulaṃ gaṇanāto asaṅkhiyaṃ,
\nUpaḍḍhadussadānena modāmi akutobhayo.

5284. Icchamāno cahaṃ ajja sakātanaṃ sapabbataṃ,
\nKhomadussehi chādeyyaṃ aḍḍhadussassidaṃ phalaṃ.

5285. Satasahasse ito kappe yaṃ dānamadadiṃ tadā,
\nDuggatiṃ nābhijānāmi aḍḍadussassidaṃ phalaṃ.

5286. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5287. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5288. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā upaḍḍhadussadāyako thero imā gāthāyo abhisitthāti.

Upaḍḍhadussadāyakattherassa apadānaṃ pañcamaṃ.

496. Ghatamaṇḍadāyakattherāpadānaṃ

5289. Sacintitaṃ bhagavantaṃ lokajeṭṭhaṃ narāsabhaṃ,
\nUpaviṭṭhaṃ mahāraññaṃ1 mātābādhena pīḷitaṃ.
\nDisvā cittaṃ pasādetvā ghatamaṇḍaṃ upānayiṃ. 2

5290. Katattā ācitattā ca3 gaṅgā bhāgīrathi4 ayaṃ,
\nMahāsamuddā cattāro ghataṃ sampajjare mama.

5291. Ayaṃ ca paḍhavī ghorā appamāṇā asaṃkhiyā,
\nMama saṅkappamaññāya bhavate madhusakkharā. 5

5292. Cātuddipā ime rukkhā pādapā dharaṇiruhā,
\nMama saṅkappamaññāya kapparukkhā bhavanti te.

5293. Paññāsakkhattuṃ devindo devarajjamakārayiṃ,
\nEkapaññāsakkhattuñca cakkavattī ahosahaṃ.
\nPadesarajjaṃ vipulaṃ gaṇanāto asaṃkhiyaṃ.

5294. Channavute ito6 kappe yaṃ dānamadadiṃ tadā,
\nDuggatiṃ nābhijānāmi ghatamaṇaḍassidaṃ phalaṃ.

1. Mahāvīraṃ, sīmu.
\n2. Ghatamaṇḍamupānayiṃ, machasaṃ.
\n3. Upacittāca, syā.
\n4. Bhāgīrasī, sīmu,
\n5. Madhusakkarā, machasaṃ.
\n6. Catunnavutito, machasaṃ.

[BJT Page 228] [\x 228/]

5295. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5296. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5297. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā ghatamaṇḍadāyako thero imā gāthāyo abhisitthāti.

Ghatamaṇḍadāyakattherassa apadānaṃ chaṭṭhaṃ.

497. Udakadāyakattherāpadānaṃ

5298. Padumuttarabuddhassa [PTS Page 437] [\q 437/]      bhikkhusaṅghe anuttare,
\nPasannacitto sumano pānīyaghaṭamapūjayiṃ1.

5299. Pabbatagge dumagge vā ākāse vātha bhūmiyaṃ,
\nYadā panīyamicchāmi khippaṃ nibbattate mama.

5300. Satasahasse ito kappe yaṃ dānamadadiṃ tadā,
\nDuggatiṃ nābhijānāmi dākadānassidaṃ2 phalaṃ.

5301. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5302. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5303. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā udakadāyako thero imā gāthāyo abhisitthāti.

Udakadāyakattherassa apadānaṃ sattamaṃ.

498. Pulinathūpiyattherāpadānaṃ

5304. Himavantassa avidūre yamako nāma pabbato,
\nAssamo sukato mayhaṃ paṇṇasālā sumāpitā.

5305. Nārado nāma nāmena jaṭilo uggatāpano,
\nCatuddasasahassāni sissā paricaranti maṃ.

1. Pānīyaghaṭamapūrayiṃ, machasaṃ.
\n2. Ghatamaṇḍassidaṃ, sīmu.

[BJT Page 230] [\x 230/]

5206. Paṭisallīnako santo evaṃ cintesahaṃ tadā:
\nSabbo jano maṃ pūjeti nāhaṃ pūjemi kiñcanaṃ.

5307. Na me ovādako atthi vattā koci na vijjati,
\nAnācariyupajjhāyo vane vāsaṃ upemahaṃ.

5308. Upāsamāno yamahaṃ garucittaṃ upaṭṭhahe,
\nSo me ācariyo natthi vanavāso niratthako.

5309. Āyāgamme gavesissaṃ garuṃ bhāvaniyaṃ tathā,
\nSāvassayo vasissāmi na koci karahissati.

5310. Uttānakūlā nadikā supatitthā manoramā,
\nSusuddhapulinākiṇṇā avidūre mamassamaṃ.

5311. Nadiṃ amarikaṃ nāma upagantvanahaṃ tadā,
\nSaṃvaḍḍhayitvā pulinaṃ akaṃ pulinacetiyaṃ.

5312. Ye [PTS Page 438] [\q 438/]      te ahesuṃ sambuddhā bhavantakaraṇā munī,
\nTesaṃ etādiso thūpo tantimittaṃ karomahaṃ.

5313. Karitvā pulinaṃ1 thūpaṃ sovaṇṇaṃ māpayiṃ ahaṃ,
\nSoṇṇakiṅkapupphānaṃ2 sahasse tīṇi pūjayiṃ.

5314. Sāyaṃ pātaṃ namassāmi vedajāto katañjali,
\nSammukhā viya sambuddhā vandiṃ pulinacetiyaṃ.

5315. Yadā kilesā jāyanti vitakkā gehanissitā,
\nSarāmi sugataṃ3 thūpaṃ paccavekkhāmi tāvade.

5316. Upanissāya viharaṃ satthamāhaṃ vināyakaṃ,
\nKilese saṃvaseyyāsi na yutta tava mārisa.

5317. Saha āvajjite thūpe gāravaṃ hoti me tadā,
\nKuvitakke vinodemi4 nāgo tuttaṭṭito yathā.

5318. Evaṃ viharamānaṃ maṃ maccurājābhimaddatha,
\nTattha kālakato5 santo brahmalokaṃ agacchahaṃ. 6

5319. Yāvatāyuṃ vasitvāna tidase upapajjahaṃ,
\nAsītikkhattuṃ devindo devarajjamakārayiṃ.

5320. Satānaṃ tīṇikkhattuñca cakkavatti ahosahaṃ,
\nPadesarajjaṃ vipulaṃ gaṇanāto asaṃkhiyaṃ.

1. Puline, sīmu. Syā. [PTS.]
\n2. Soṇṇakiṅkaṇipupphāni, machasaṃ.
\n3. Sukataṃ, machasaṃ.
\n4. Vinodesiṃ, machasaṃ
\n5. Kālaṅkato, machasaṃ.
\n6. Brahmalokamacchahaṃ, machasaṃ.

[BJT Page 232] [\x 232/]

5321. Tesaṃ kiṅkaṇipupphānaṃ1 vipākaṃ anubhomahaṃ,
\nDhānīsatasahassāni parivārenti maṃ bhave.

5322. Thūpassa pariciṇṇattā rajojallaṃ na limpati,
\nGatte sedā na muccanti sappabhāso2 bhavāmahaṃ.

5323. Aho me sukato thūpo sudiṭṭhāmarikā nadī,
\nThūpaṃ katvāna pulinaṃ3 pattomhi acalaṃ padaṃ.

5324. Kusalaṃ kattukāmena jantunā sāgāhinā,
\nNatthi khettaṃ akhettā vā paṭipattīva sādhakā4.

5325. Yathāpi balavā poso aṇṇavaṃ taritussahe,
\nParittaṃ kaṭṭhamādāya pakkakhandeyya mahāsaraṃ:

5326. Imāhaṃ kaṭṭhaṃ nissāya tarissāmi mahodadhiṃ,
\nUssāhena ca viriyena tareyya udadhiṃ naro.

5327. Tatheva [PTS Page 439] [\q 439/]      me kataṃ kammaṃ parittaṃ thokakañca yaṃ,
\nTaṃ kammaṃ upanissāya saṃsāraṃ samatikkamiṃ.

5328. Pacchime bhave sampatte sukkamūlena vodito,
\nSāvatthiyaṃ pure jāto mahāsāle suaḍḍhake.

5329. Saddhā mātāpitā mayhaṃ buddhassa saraṇaṃ gatā,
\nUbho diṭṭhapadā ete anuvattanti sāsanaṃ.

5330. Bodhipapaṭikaṃ gayha soṇṇathūpaṃ akārayuṃ,
\nSāyaṃpātaṃ namassanti sakyaputtassa sambukhā.

5331. Uposathamhi divase soṇṇathūpaṃ vinīharuṃ,
\nBuddhassa vaṇṇaṃ kittentā tiyāmaṃ vītināmayuṃ.

5332. Saha disvānahaṃ thūpaṃ sariṃ pulinacetiyaṃ,
\nEkāsane nisīditvā arahattamapāpuṇiṃ.

(Dvāvīsatimaṃ bhāṇavāraṃ. )

5333. Gavesamāno taṃ vīraṃ dhammasenāpatiddasaṃ,
\nAgārā nikkhamitvāna pabbajiṃ tassa santike.

5334. Jātiyā sattavassena arahattamapāpuṇiṃ,
\nUpasampādayī buddho guṇamaññāya cakkhumā

1. Soṇṇakiṅkaṇipupphānaṃ, machasaṃ.
\n2. Suppabhāso, machasaṃ.
\n3. Puline, sīmu.
\n4. Sāritā, [PTS] Sāratā, syā.

[BJT Page 234] [\x 234/]

5336. Dārakeneva santena kiriyaṃ niṭṭhitaṃ mayā,
\nKataṃ me karaṇiyajja sakyaputtassa sāsane.

5337. Sabbaverabhayānīto sabbasaṅgātigo isi,
\nSāvako te mahāvīra soṇṇapupphassasidaṃ phalaṃ.

5338. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5339. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5340. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā pilinathūpiyo thero imā gāthāyo abhisitthāti.

Pulinathūpiyattherassa apadānaṃ aṭṭhamaṃ.

499. Naḷakuṭidāyakattherāpadānaṃ

5341. Himavantassa [PTS Page 440] [\q 440/]      avidūre hārito nāma pabbato,
\nSayambhū nārado nāma rukkhamūle vasī tadā.

5342. Naḷāgārā karitvāna tiṇena chādayiṃ ahaṃ,
\nCaṅkamaṃ sodhayitvāna sayambhussa adāsahaṃ.

5343. Tena kamemana sukatena cetanāpaṇidhīhi ca,
\nJahitvā mānusaṃ dehaṃ tāvatiṃsamagacchahaṃ.

5344. Tattha me sukataṃ vyambhaṃ naḷakuṭikāya nimmitaṃ,
\nSaṭṭhiyojanamubbedhaṃ tiṃsayojanavitthataṃ.

5345. Catuddasasu kappesu devaloke ramiṃ ahaṃ,
\nEkasattatikkhattuñca devarajjamakārayiṃ.

5346. Catuttiṃsakkhattuñca cakkavattī ahosahaṃ,
\nPadesarajjaṃ vipulaṃ gaṇanāto asaṃkhiyaṃ.

5347. Dhammapāsādamāruya sabbākāravarūpamaṃ,
\nYadicchakāhaṃ vihare sakyaputtassa sāsane.

[BJT Page 236] [\x 236/]

5348. Ekatiṃse ito kappe yaṃ kammamakariṃ tadā,
\nDuggatiṃ nābhijānāmi naḷakuṭiyā idaṃ phalaṃ.

5349. Kilesā jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5350. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5351. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā naḷakuṭidāyako thero imā gāthāyo abhisitthāti.

Naḷakuṭidāyakattherassa apadānaṃ navamaṃ.

500. Piyālaphaladāyakattherāpadānaṃ

5352. Migaluddo pure āsi vipine vicaraṃ tadā,
\nAddasaṃ virajaṃ buddhaṃ sabbadhammānapāraguṃ.

5353. Piyālaphalamādāya buddhaseṭṭhassadāsahaṃ,
\nPuññakkhettassa vīrassa pasanno sehi pāṇihi.

5354. Ekatiṃse ito kappe yaṃ phalaṃ adadiṃ tadā,
\nDuggatiṃ nābhijānāmi phaladānassidaṃ phalaṃ.

5355. Kilesā [PTS Page 441] [\q 441/]      jhāpitā mayhaṃ bhavā sabbe samūhatā,
\nNāgo’va bandhanaṃ chetvā viharāmi anāsavo.

5356. Svāgataṃ vata me āsi buddhaseṭṭhassa santike,
\nTisso vijjā anuppattā kataṃ buddhassa sāsanaṃ.

5357. Paṭisambhidā catasso ca vimokkhāpi ca aṭṭhime,
\nChaḷabhiññā sacchikatā kataṃ buddhassa sāsanaṃ.

Itthaṃ sudaṃ āyasmā piyālaphaladāyako thero imā gāthāyo abhisitthāti.

Piyālaphaladāyakattherassa apadānaṃ dasamaṃ.

Tikiṅkaṇipupphiyavaggo paññāsamo.

Uddānaṃ:

Kiṅkaṇi paṃsukūlañca koraṇḍamatha kiṃsakaṃ
\nUpaḍḍhadussī ghatado udakaṃ thupakārako
\nNaḷāgārī ca navamo piyālaphaladāyako. Sataṃ eka ca gāthānaṃ navakañca taduttariṃ.

Atha vagguddānaṃ:

Metteyyavaggo bhaddāli sakiṃsammajjako pi ca
\nEkavihārī vībhīṭakī jagatī sālapupphiyo
\nNaḷāgāraṃ paṃsukūlaṃ kiṅkaṇipupphiyo tathā.
\nAsīti dve ca gāthāyo catuddasasatāni ca.

Metteyyavaggadasakaṃ.

Pañcamaṃ satakaṃ samattaṃ.