[CPD Classification 2.5.8]
\n[PTS Vol Th 1 ] [\z Th /] [\f I /]
\n[BJT Vol Th 1 ] [\z Th /] [\w I /]
\n[PTS Page 069] [\q  69/]
\n[BJT Page 180] [\x 180/]
Theragāthāpāḷi
\nNidānagāthā

Namo tassa bhagavato arahato sammāsambuddhassa

16. Soḷasanipato.

16. 1. 1
\n673. Esa  bhiyyo pasīdāmi sutvā dhammaṃ mahārasaṃ,
\nVirāgo desito dhammo anupādāya sabbaso.

674. Bahūni loke citrāni asamiṃ paṭhavimaṇḍale, 1
\nMathenti maññe saṅkappaṃ subhaṃ rāgūpasaṃhitaṃ.

675. Rajamuhataṃ2 ca vātena yathā meghopasammaye, 3
\nEvaṃ sammanti saṅkappā yadā paññāya passati,

676. Sabbe saṅkhārā aniccāti yadā paññāya passati,
\nAtha nibbindati dukkhe esa maggo visuddhiyā.

677. Sabbe saṅkhārā dukkhāti yadā paññāya passati,
\nAtha nibbindati dukkhe esa maggo visuddhiyā.

678. Sabbe dhammā anattā’ti yadā paññāya passati,
\nAtha nibbindati dukkhe esa maggo visuddhiyā.

679. Buddhānubuddho yo thero koṇḍañño tibbanikkamo, 4
\nPahīnajātimaraṇo brahmacariyassa kevalī.

680. Oghapāso daḷhakhilo pabbato duppadāliyo, 5
\nChetvā khilaṃ ca6 pāsaṃ ca selaṃ bhetvāna7 dubbhidaṃ,
\nTiṇṇo pāraṅgato jhāyī mutto so mārabandhanā.

681. Uddhato capalo bhakkhu mitte āgamma pāpake,
\nSaṃsīdati mahoghasmiṃ ūmiyā paṭikujjito.

682. Anuddhato acapalo nipako saṃvutindriyo,
\nKalyāṇamitto medhāvī dukkhassantakaro siyā.

683. Kālapabbaṅgasaṅkāso kiso dhamanisanthato,
\nMattaññū annapānasmiṃ adīnamānaso naro.

684. Phuṭṭho ḍaṃsehi makasehi araññasmiṃ brahāvane,
\nNāgo saṅgāmasīse’va sato tatrādhivāsaye.

685. Nābhinandāmi maraṇaṃ nābhinandāmi jīvitaṃ,
\nKālaṃ ca patikaṅkhāmi nibbisaṃ bhatako yathā.

1 Puthuvimaṇḍale-[PTS.]
\n2 Rajamupātaṃ-[PTS.]
\n3 Megho pasāmaye-[PTS.]
\n4 Tibbanikkhamo-[PTS.]
\n5 Duppadālayo-sīmu. 1, 2.
\n6 Khīlañca-[PTS.]
\n7 Chetvāna-sīmu. 1, 2.

[BJT Page 182] [\x 182/]
\n686. Nābhinandāmi maraṇaṃ nābhinandāmi jīvitaṃ,
\nKālaṃ ca patikaṅkhāmi sampajāno patissato.

687. Pariciṇṇo mayā satthā kataṃ buddhassa sāsanaṃ,
\nOhito garuko bhāro bhavanetti samūhatā.

688. Yassatthāya1 pabbajito agārasmānagāriyaṃ,
\nSo me attho anuppatto kiṃ me saddhivihārinā’ti. 2

Itthaṃ sudaṃ āyasmā aññākoṇḍañño thero gāthāyo abhāsitthā’ti.

Aññākoṇḍaññattheragāthā.

16. 1. 2
\n689. Manussabhūtaṃ sambuddhaṃ attadantaṃ samāhitaṃ,
\nIriyamānaṃ3 brahmapathe cittassūpasame rataṃ.
\n690. Yaṃ manussā namassanti sabbadhammāna pāraguṃ,
\nDevā’pi taṃ namassanti iti me arahato sutaṃ.

691. Sabbasaṃyejanātītaṃ [PTS Page 070] [\q  70/]      vanā nibbanamāgataṃ, 4
\nKāmehi nekkhammarataṃ5 muttaṃ selā’va6 kañcanaṃ.

692. Sa ve accantaruci nāgo himavā maññe siluccaye,
\nSabbesaṃ nāganāmānaṃ saccanāmo anuttaro.

693. Nāgaṃ vo kittayissāmi na hi āguṃ karoti so,
\nSoraccaṃ avihiṃsā ca pādā nāgassa te duve.

694. Sati ca sampajaññaṃ ca caraṇā nāgassa te pare,
\nSaddhā hattho mahānāgo upekkhāsetadantavā.
\n695. Sati ca sampajaññaṃ caraṇā nāgassa te pare,
\nDhammakucchisamāvāso viveko tassa vāladhi.

696. So jhāyī assāsarato ajjhattaṃ susamāhito,
\nGacchaṃ samāhito nāgo ṭhito nāgo samāhito.

697. Sayaṃ samāhito nāgo nisinno’pi samāhito,
\nSabbattha saṃvuto nāgo esā nāgassa sampadā.

698. Bhuñjati anavajjāni sāvajjāni na bhuñjati,
\nGhāsamacchādanaṃ laddhā sanni’dhiṃ parivajjayaṃ.

1 Yassacatthāya-[PTS.]
\n2 Sandavihārenā’ti-[PTS.]
\n3 Irimānaṃ-pa, irīyamānaṃ-sīmu. 1, 2.
\n4 Nibbāṇamāgataṃ-sīmu. 1, 2.
\n5 Nikkhammarataṃ-[PTS.]
\n6 Muttaselāva-[PTS.]

[BJT Page 184] [\x 184/]
\n699. Saṃyojanaṃ aṇuṃ thūlaṃ sabbaṃ chetvāna bandhanaṃ,
\nYena yeneva gacchati anapekkhova gacchati.

700. Yathāpi udake jātaṃ puṇḍarīkaṃ pavaḍḍhati,
\nNopalippati toyena sucigandhaṃ manoramaṃ.

701. Tatheva ca loke jāto buddho loke viharati,
\nNopalippati lokena toyena padumaṃ yathā.

702. Mahāgini pajjalito anāhāropasammati,
\nAṅgāresu ca santesu nibbuto’ti pavuccati.

703. Atthassāyaṃ viññāpanī upamā viññūhi desitā,
\nViññissanti mahānāgā nāgaṃ nāgena desitaṃ.

704. Vītarāgo vītadoso vītamoho anāsavo,
\nSarīraṃ vijahaṃ nāgo parinibbissantyanāsavo’ti.

Itthaṃ sudaṃ āyasmā udāyī thero gāthāyo abhāsitthā’ti.

Udāyittheragāthā.

Tassuddānaṃ:
\nKoṇḍañño ca udāyī ca therā dve te mahiddhikā,
\nSoḷasamhi nipātamhi gāthāyo dve ca tiṃsa cā’ti.

Soḷasanipāto niṭṭhito.