[CPD Classification 2.5.8]
\n[PTS Vol Th 1 ] [\z Th /] [\f I /]
\n[BJT Vol Th 1 ] [\z Th /] [\w I /]
\n[PTS Page 049] [\q  49/]
\n[BJT Page 134] [\x 134/]
Theragāthāpāḷi
\nNidānagāthā

Namo tassa bhagavato arahato sammāsambuddhassa


\n

7. Sattakanipāto.

7. 1. 1
\n459. Alaṅkatā  suvasanā mālabhārī1 vibhūsitā,
\nAlattakakatāpādā pādukāruyha vesikā.

460. Pādukā oruhitvāna purato pañjalīkatā,
\nSā maṃ saṇhena mudunā mihitapubbaṃ abhāsatha.

461. Yuvāsi tvaṃ pabbajito tiṭṭhāhi mama sāsane,
\nBhuñja mānusake kāme ahaṃ vittaṃ dadāmi te.

462. Saccaṃ te paṭijānāmi aggiṃ vā te harāmahaṃ,
\nYadā jiṇṇā bhavissāma ubho daṇḍaparāyanā,
\nUbho pi pabbajissama ubhayattha kaṭaggaho.

463. Taṃ ca disvāna yācantiṃ vesikaṃ pañjalīkataṃ,
\nAlaṅkataṃ suvasanaṃ maccupāsaṃ va oḍḍitaṃ.

464. Tato me manasīkārā yoniso udapajjatha,
\nĀdīnavo pāturahu nibbidā samatiṭṭhatha.

465. Tato cittaṃ vimucci me passa dhammasudhammataṃ,
\nTisso vijjā anuppattā kataṃ buddhassa sāsana’nti.

Itthaṃ sudaṃ āyasmā sundarasamuddo thero gāthāyo abhāsitthā’ti.

Sundarasamuddattheragāthā.

7. 1. 2
\n466. Pare ambāṭakārāme vanasaṇḍamhi bhaddiyo,
\nSamūlaṃ taṇhamabbuyha tattha bhaddo jhayāyati. 2

467. Ramanteke mutiṅgehi3 vīṇāhi paṇavehi ca,
\nAhaṃ ca rukkhamūlasmiṃ rato buddhassa sāsane.

468. Buddho ce4 me varaṃ dajjā so ca labbhetha me varo,
\nGaṇhehaṃ sabbalokassa niccaṃ kāyagataṃ satiṃ.

469. Ye maṃ rūpena pāmiṃsu ye ca ghesena anvagū,
\nChandarāgavasūpetā na maṃ jānanti te janā.

1 Mālābhārī-sīmu. Māladhārī-machasaṃ, [PTS.]
\n2 Bhaddodhijhāyāyati-sīmu. 1. Bhaddodhijhāyāti-sīmu. 2.
\n3 Mudiṅgehi-sīmu. 1, 2.
\n4 Ca-sīmu. 1, 2, Pa, [PTS.]

[BJT Page 136] [\x 136/]
\n470. Ajjhattaṃ ca na jānāti bahiddhā ca na passati,
\nSamantāvaraṇo bālo sa ve ghesena vuyhati.

471. Ajjhattaṃ ca na jānāti bahiddhā ca vipassati,
\nBahiddhā phaladassāvī so’pi ghosena vuyhati.

470. Ajjhattaṃ ca pajānāti bahiddhā ca vipassati,
\nAnāvaraṇadassāvī na so ghosena vuyhatī’ti.

Itthaṃ sudaṃ āyasmā lakuṇṭakabhaddiyo thero gāthāyo abhāsitthā’ti.

Lakuṇṭakabhaddiyattheragāthā.

7. 1. 3
\n473. Ekaputto [PTS Page 050] [\q  50/]      ahaṃ āsiṃ piyo mātu piyo pitu,
\nBahūhi vatacariyāhi laddho āyācanāhi ca.

474. Te ca maṃ anukampāya atthakāmā hitesino,
\nUbho pitā ca mātā ca buddhassa upanāmayuṃ,

475. Kicchā laddho ayaṃ putto sukhumālo sukhedhito,
\nImaṃ dadāma te nātha jinassa paricārakaṃ. 1

476. Satthā ca maṃ paṭiggayha ānandaṃ etadabravi,
\nPabbājehi imaṃ khippaṃ hessatyājāniyo ayaṃ.

477. Pabbājetvāna maṃ satthā vihāraṃ pāvisī jino,
\nAnoggatasmiṃ suriyasmiṃ tato cittaṃ vimucci me.

478. Tato satthā niraṃkatvā paṭisannānavuṭṭhato,
\nEhi bhaddā’ti maṃ āha sā me āsūpasampadā.

479. Jātiyā sattavassena laddhā me upasampadā,
\nTisso vijjā anuppattā aho dhammasudhammatā’ti.

Itthaṃ sudaṃ āyasmā bhaddo thero gāthāyo abhāsitthā’ti.

Bhaddattheragāthā.

1 Paricārikaṃ-sīmu. 1, 2.

[BJT Page 138] [\x 138/]
\n7. 1. 4
\n480. Disvā pāsādachāyāyaṃ caṅkamantaṃ naruttamaṃ,
\nTattha naṃ upasaṅkamma vandisaṃ purisuttamaṃ.

481. Ekaṃ saṃ cīvaraṃ katvā saṃharitvāna pāṇayo, 1
\nAnucaṅkamissaṃ virajaṃ sabbasattānamuttamaṃ.

482. Tato pañhe apucchi maṃ pañhānaṃ kovido vidū,
\nAcchambhī ca abhīto ca vyākāsiṃ satthuno ahaṃ.

483. Vissajjitesu pañhesu anumodi tathāgato,
\nBhikkhusaṅghaṃ viloketvā imamatthaṃ abhāsatha.

484. Lābhā aṅgānamagadhānaṃ yesāyaṃ paribhuñjati,
\nCīvaraṃ piṇḍapātaṃ ca paccayaṃ sayanāsanaṃ,
\nPaccuṭṭhānaṃ ca sāmīciṃ tesaṃ lābhāti cābravi. 2

485. Ajjatagge maṃ sopāka assanāyupasaṅkama, 3
\nEsā ceva te sopāka bhavatu upasampadā.

486. Jātiyā sattavassohaṃ laddhāna upasampadaṃ,
\nDhāremi antimaṃ dehaṃ aho dhammasudhammatā’ti.

Itthaṃ sudaṃ āyasmā sopāko thero gāthāyo abhāsitthā’ti.

Sopākattheragāthā.

7. 1. 5
\n487. Sare hatthehi bhañjitvā katvāna kuṭimacchisaṃ,
\nTena me sarabhaṅgoti nāmaṃ sammutiyā ahu.

488. Na [PTS Page 051] [\q  51/]      mayhaṃ kappate ajja sare hatthehi bhañjituṃ,
\nSikkhāpadā no paññattā gotamena yasassinā.

489. Sakalaṃ samattaṃ rogaṃ sarabhaṅgo nāddasaṃ4 pubbe,
\nSo’yaṃ rogo diṭṭho vacanakarenātidevassa.

490. Yeneva maggena gato vipassī
\nYeneva maggena sikhī ca nessabhū,
\nKakusandhakoṇāgamanā ca kassapo
\nTenañjasena agamāsi gotamo.

1 Paṇiyo-[PTS.]
\n2 Cabravi-sīmu. 1, 2.
\n3 Dassanāyūpasaṅkama-sīmu. 1, 2. Dassanāyopasaṅkama-[PTS.]
\n4 Nāddassaṃ-sīmu. 1.

[BJT Page 140] [\x 140/]
\n491. Vītataṇhā anādānā satta buddhā khayogadhā,
\nYehayaṃ1 denito dhammo dhammabhūtehi tādihi.

492. Cattāri ariyasaccāni anukampāya pāṇinaṃ,
\nDukkhaṃ samudayo maggo nirodho dukkhasaṅkhayo.

493. Yasmiṃ nivattate dukkhaṃ saṃsārasmiṃ anantakaṃ,
\nBhedā imassa kāyassa jīvitassa ca saṅkhayā,
\nAñño punabbhavo natthi suvimuttomhi sabbadhī’ti.

Itthaṃ sudaṃ āyasmā sarabhaṅgo thero gāthāyo abhāsitthā’ti.

Sarabhaṅgattheragāthā.

Tassuddānaṃ:
\nSundarasamuddo thero thero lakuṇṭabhaddiyo,
\nBhaddo thero ca sopāko sarabhaṅgo mahāisi,
\nSattake pañcakā therā gāthāyo pañcatiṃsatī’ti.

Sattakanipāto niṭṭhito.