[CPD Classification 2.5.8]
\n[PTS Vol Th 1 ] [\z Th /] [\f I /]
\n[BJT Vol Th 1 ] [\z Th /] [\w I /]
\n[PTS Page 042  [\q  42/]     6. 1. 1]
\n[BJT Page 118] [\x 118/]
Theragāthāpāḷi
\nNidānagāthā

Namo tassa bhagavato arahato sammāsambuddhassa

6. Chakkanipāto.

375. Disvāna pāṭihīrāni gotamassa yasassino,
\nNa tāvāhaṃ paṇipatiṃ issāmānena vañcito.

376. Mama saṅkappamaññāya codesi narasārathi,
\nTato me āsi saṃvego abbhuto lomahaṃsano.

377. Pubbe jaṭilabhūtassa yā me siddhi1 parittikā,
\nTāhaṃ tadā niraṃkatvā pabbajiṃ jinasāsane.

378. Pubbe yaññena santuṭṭho kāmadhātupurakkhato,
\nPacchā rāgaṃ ca dosaṃ ca mohaṃ cāpi samūhaniṃ.

379. Pubbenivāsaṃ jānāmi dabbacakkhu visodhitaṃ,
\nIddhimā paracittaññū dibbasotañca pāpuṇiṃ.

380. Yassa catthāya pabbajito agārasmānagāriyaṃ, 2
\nSo me attho anuppatto sabbasaṃyojanakkhayo’ti.

Itthaṃ sudaṃ āyasmā uruvelakassapo thero gāthāyo abhāsitthā’ti.

Uruvelakassapattheragāthā.

6. 1. 2
\n381. Atihitā vīhi khalagatā sālī,
\nNa ca labhe piṇḍaṃ kathamahaṃ kassaṃ.

382. Buddhamappameyyaṃ anussara3 pasanno,
\nPītiyā phuṭasarīro hohisi4 satatamudaggo.

383. Dhammamappameyyaṃ anussara3 pasanno,
\nPītiyā phuṭasarīro hohisi4 satatamudaggo.

384. Saṅghamappameyyaṃ anussara3 pasanno,
\nPītiyā phuṭasarīro hohisi4 satatamudaggo.
\n385. Abbhokāse viharasi sītā hemantikā imā rattiyo,
\nMā sītena pareto vihaññittho pavisa tvaṃ vihāraṃ phusitaggaḷaṃ.

386. Phusissaṃ catasso appamaññāyo
\nTāhi ca sukhito viharissaṃ,
\nNāhaṃ sītena vihaññissaṃ
\nAniñjito viharanto’ti.

Itthaṃ sudaṃ āyasmā tekicchakāni thero gāthāyo abhāsitthā’ti.

Tekicchakānittheragāthā.

1 Iddhi-pa.
\n2 Agārasmā anagāriyaṃ-[PTS.]
\n3 Anussaraṃ-sīmu. 1, 2.
\n4 Hosi-sīmu. 1, 2, [PTS.]

[BJT Page 120] [\x 120/]
\n6. 1. 3
\n387. Yassa [PTS Page 043] [\q  43/]      sabrahmacārīsu gāravo nūpalabbhati,
\nParihāyati saddhammā maccho appodake yathā.

388. Yassa sabrahmacārīsu gāravo nūpalabbhati,
\nNa virūhati saddhamme khette bījaṃva pūtikaṃ.

389. Yassa sabrahmacārīsu gāravo nūpalabbhati,
\nArako hoti nibbānā, dhammarājassa sāsane.

390. Yassa sabrahmacārīsu gāravo nūpalabbhati,
\nNa vihāyati saddhammā maccho bavhodake yathā.

391. Yassa sabrahmacārīsu gāravo nūpalabbhati,
\nSo virūhati saddhamme khette bījaṃva bhaddakaṃ.

392. Yassa sabrahmacārīsu gāravo nūpalabbhati,
\nSantike hoti nibbānaṃ dhammarājassa sāsane’ti.

Itthaṃ sudaṃ āyasmā mahānāgo thero gāthāyo abhāsitthā’ti.

Mahānāgattheragāthā.

6. 1. 4
\n393. Kullo sīvathikaṃ gantvā addasa itthimujjhataṃ,
\nApaviddhaṃ susānasmiṃ khajjantiṃ kimihī phuṭaṃ.

394. Āturaṃ asuciṃ pūtiṃ passa kulla samussayaṃ,
\nUggharantaṃ paggharantaṃ bālānaṃ abhinanditaṃ.

395. Dhammādāsaṃ gahetvāna ñāṇadassanapattiyā,
\nPaccavekkhiṃ imaṃ kāyaṃ tucchaṃ santarabāhiraṃ.

396. Yathā idaṃ tathā etaṃ, yathā etaṃ tathā idaṃ,
\nYathā adho tathā uddhaṃ yathi uddhaṃ tathā adho.

397. Yathā divā tathā rattiṃ yathā rattiṃ tathā divā,
\nYathā pure tathā pacchā yathā pacchā tathā pure.

398. Pañcaṅgikena turiyena na ratī hoti tādisī,
\nYathā ekaggacittassa sammā dhammaṃ vipassato’ti.

Itthaṃ sudaṃ āyasmā kullo thero gāthāyo abhāsitthā’ti.

Kullattheragāthā.

[BJT Page 122] [\x 122/]
\n6. 1. 5
\n399. Manujassa pamattacārino taṇhā vaḍḍhati māluvā viya,
\nSo palavati hurā huraṃ phalamicchaṃ va vanasmiṃ vānaro.

400. Yaṃ esā sahate1 jammi taṇhā loke visattikā,
\nSokā tassa pavaḍḍhati abhivaṭṭhaṃ va bīraṇaṃ.

401. Yo cetaṃ2 sahate jammiṃ taṇhaṃ loke duraccayaṃ,
\nSokā tamhā papatanti udabinduva pokkharā.

402. Taṃ [PTS Page 044] [\q  44/]      vo vadāmi bhaddaṃ vo yāvantettha samāgatā,
\nTaṇhāya mūlaṃ khaṇatha usīrattheva bīraṇaṃ,
\nMā vo naḷaṃ va soto va māro bhañji punappunaṃ.

403. Karotha buddhavacakaṃ khaṇo vo3 mā upaccagā,
\nKhaṇatītā hi socanti nirayamhi samappitā.

404. Pamādo rajo sabbadā4 pamādānupatito rajo,
\nAppamādena vijjāya abbahe sallamattano’ti.

Itthaṃ sudaṃ āyasmā māluṅkyaputto thero gāthāyo abhāsitthā’ti.

Māluṅkyaputtattheragāthā.

6. 1. 6
\n405. Paṇṇavīsati vassāni yato pabbajito ahaṃ,
\nAccharāsaṅghātamattampi cetosantimanajjhagaṃ.
\n406. Aladdhā cittassekaggaṃ kāmarāgena addito, 5
\nBāhā paggayha kandanto vihārā upanikkhamiṃ.

407. Satthaṃ vā āharissāmi ko attho jīvitena me,
\nKathaṃ hi sikkhaṃ paccakkhaṃ kālaṃ kubbetha mādiso.

408. Tadāhaṃ khuramādāya mañcakamhi upāvisiṃ,
\nParinīto khuro āsi dhamaniṃ chettumattano.

409. Tato me manasikāro yoniso udapajjatha,
\nĀdīnavo pāturahu nibbidā samatiṭṭhatha.

410. Tato cittaṃ vimucci me passa dhammasudhammataṃ,
\nTisso vijjā anuppattā kataṃ buddhassa sāsana’nti.

Itthaṃ sudaṃ āyasmā sappadāso thero gāthāyo abhāsitthā’ti.

Sappadāsattheragāthā.

1 Sahatī-[PTS.]
\n2 Yo vetaṃ-pa.
\n3 Ve-[PTS.]
\n4 Pamādo rajo-pa, [PTS.]
\n5 Aṭṭito-sīmu. 1, 2.

[BJT Page 124] [\x 124/]
\n6. 1. 7
\n411. Uṭṭhehi1 nisīdi kātiyāna
\nMā niddābahulo ahu jāgarassu,
\nMā taṃ alasaṃ pamattabandhu
\nKūṭeneva jinātumaccurājā.

412. Sayathāpi2 mahāsamuddavego
\nEvaṃ jātijarātivattate taṃ,
\nSo karohi sudīpamattanā tvaṃ
\nNa hi tāṇaṃ tava vijjateva aññaṃ.

413. Satthā hi vijesi maggametaṃ
\nSaṅgā jātijarābhayā atītaṃ, 3
\nPubbāpararattamappamatto
\nAnuyuñjassu daḷhaṃ karohi yogaṃ.

414. Purimāni pamuñca bandhanāni
\nSaṅghāṭi khuramuṇḍabhikkhabhojī,
\nMā khiḍḍāratiñca niddaṃ4
\nAnuyuñjittha jhāya kātiyāna. 5
\n415. Jhāyāhi [PTS Page 045] [\q  45/]      jināhi kātiyāna
\nYogakkhemapathesu kovidosi,
\nPappuyya anuttaraṃ visuddhaṃ
\nParinibbāhisi vārināva joti.

416. Pajjotikaro parittaraṃso
\nVātena vinamyate latāva,
\nEvampi tuvaṃ anādiyāno
\nMāraṃ indasagotta niddhunāhi,
\nSo vedayitāsu vītarāso
\nKālaṃ kaṅkha idheva sītibhūto’ti.

Itthaṃ sudaṃ āyasmā kātiyāno thero gāthāyo abhāsitthā’ti.

Kātiyānattheragāthā.

6. 1. 8
\n417. Sudesito cakkhumatā buddhenādiccabandhunā,
\nSabbasaṃyojanātīto sabbavaṭṭavināsano.

418. Niyyāniko uttaraṇo taṇhāmūlavisosano,
\nVisamūlaṃ āghātanaṃ chetvā pāpeti nibbutiṃ.

419. Aññaṇamūlabhedāya kammayantavighāṭano,
\nViññāṇānaṃ parillahe ñāṇavajīranipātino.

1 Uṭṭhāhi-[PTS.]
\n2 Seyyathāpi-machasaṃ.
\n3 Atītā-sīmu. 1, 2.
\n4 Mā khiṅkhāratiṃ ca mā niddaṃ-machasaṃ, [PTS.]
\n5 Anuyuñjittha kātiyāna-pa. Anuyuñjittha kkhiyāya kātiyāna-[PTS.]

[BJT Page 126] [\x 126/]
\n420. Vedanānaṃ viññapano1 upādānappamocano,
\nBhavaṃ aṅgārakāsuṃ va ñāṇena anupassako

421. Mahāraso sugambhīro jarāmaccunivāraṇo,
\nAriyo aṭṭhaṅgiko maggo dukkhūpasamano sivo.

422. Kammaṃ kammanti ñatvāna vipākaṃ ca vipākato,
\nPaṭiccuppannadhammānaṃ yathā vā lokadassano
\nMahākhemaṅgamo santo pariyosānabhaddako’ti.

Itthaṃ sudaṃ āyasmā migajālo thero gāthāyo abhāsitthā’ti.

Migajālattheragāthā.
\n6. 1. 9
\n423. Jātimadena mattohaṃ bhogaissariyena ca,
\nSaṇaṭhānavaṇṇarūpena madamatto acārihaṃ.

424. Nāttano samakaṃ kañci atirekaṃ ca maññisaṃ,
\nAtimānahato bālo patthaddho ussitaddhajo.

425. Mātaraṃ pitarañcāpi aññepi garusammate,
\nNa kañci abhivādesiṃ mānatthaddho anādaro.

426. Disvā vināyakaṃ aggaṃ sārathīnaṃ varuttamaṃ,
\nNapantamiva ādiccaṃ bhikkhusaṅghapurakkhataṃ.

427. Mānaṃ madaṃ ca chaḍḍetvā vippasannena cetasā,
\nSiranā abhivādesiṃ sabbasattānamuttamaṃ.

428. Atimāno [PTS Page 046] [\q  46/]      ca omāno pahīnā susamūhatā,
\nAsumimāno samucchinno sabbe mānavidhā hatā’ti.

Itthaṃ sudaṃ āyasmā jento thero gāthāyo abhāsitthā’ti.

Jentattheragāthā.

6. 1. 10
\n429. Yadā navo pabbajitā jātiyā sattavassiko,
\nIddhiyā abhibhotvāna pannagindaṃ mahiddhikaṃ.

430. Upajjhāyassa udakaṃ anotattā mahāsarā,
\nĀharāmi tato disvā maṃ satthā etadabravī.

431. Sāriputta imaṃ passa āgacchantaṃ kumārakaṃ,
\nUdakumbhakamādāya ajjhattaṃ susamāhitaṃ.

1 Viññapano-[PTS.]

[BJT Page 128] [\x 128/]
\n432. Pāsādikena vattena kalyāṇairiyāpatho,
\nSāmaṇeronuruddhassa iddhiyā ca visārado.

433. Ājānīyena ājañño sādhunā sādhukārito,
\nVinīto anuruddhena katakiccena sikkhito.

434. So patvā paramaṃ santiṃ sacchikatvā akuppataṃ,
\nSāmaṇero sa sumano mā maṃ jaññāti icchatī’ti.

Itthaṃ sudaṃ āyasmā sumano thero gāthāyo abhāsitthā’ti.
\nSumanattheragāthā.

6. 1. 11
\n435. Vātarogābhinīto tvaṃ viharaṃ kānane vane,
\nPaviddhagocare lūkhe kathaṃ bhikkhu karissasi.

436. Pītimukhena vipulena pharitvāna samussayaṃ,
\nLūkhampi abhisambhonto viharissāmi kānane.

437. Bhāvento sattabejjhaṅge indriyāni balāni ca,
\nJhānasokhummasampanno viharissaṃ anāsavo.

438. Vippamuttaṃ kilesehi suddhacittaṃ anāvilaṃ,
\nAbhiṇhaṃ paccavekkhanto viharissaṃ anāsavo.

439. Ajjhattaṃ ca bahiddhā ca ye me vijjiṃsu āsavā,
\nSabbe asesā ucchinnā na ca uppajjare puna.

440. Pañcakkhandhā pariññātā tiṭṭhanti chinnamūlakā,
\nDukkhakkhayo anuppatto natthi dāni punabbhavo’ti.

Itthaṃ sudaṃ āyasmā nhātakamunitthero gāthāyo abhāsitthā’ti.

Nhātakamunittheragāthā.
\n6. 1. 12
\n441. Akkodhassa kuto kodho dantassa savajīvino,
\nSammadaññā vimuttassa upasantassa tādino,

442. Tasseva [PTS Page 047] [\q  47/]      tena pāpiyo yo kuddhaṃ paṭikujjhati,
\nKuddhaṃ appaṭikujjhanto saṅgāmaṃ jeti dujjayaṃ.

443. Ubhinnamatthaṃ carati attano ca parassa caṃ
\nParaṃ saṅkupitaṃ ñatvā yo sato upasammati.

444. Ubhikkaṃ tikicchantaṃ taṃ attano ca parassa ca,
\nJanā maññanti bāloti ye dhammassa akovidā.

[BJT Page 130] [\x 130/]
\n445. Uppajje te1 sace kodho āvajja kakacūpamaṃ,
\nUppajjaje ce rase taṇhā puttamaṃsūpamaṃ sara.

446. Sace dhāvati cittaṃ te kāmesu ca bhavesu ca,
\nKhippaṃ niggaṇha satiyā kiṭṭhādaṃ viya duppasu’nti.

Itthaṃ sudaṃ āyasmā brahmadatto thero gāthāyo abhāsitthā’ti.

Brahmadattattheragāthā.

6. 1. 13
\n447. Channamativassati vivaṭaṃ nātivassati,
\nTasmā channaṃ vivaretha evaṃ taṃ nātivassati.

448. Maccunābbhāhato loko jarāya parivārito,
\nTaṇhāsallena otiṇṇo icchādhūpāyito2 sadā.

449. Maccunābbhāhato loko parikkhitto jarāya ca,
\nHaññati niccamattāṇo3 pattadaṇḍo’va takkaro.

450. Āgacchantaggikhandhā’va maccu vyādhi jarā tayo,
\nPaccuggantuṃ balaṃ natthi javo natthi palāyituṃ.

451. Amoghaṃ divasaṃ kayirā appena bahukena vā,
\nYaṃ ya vijahate4 rattiṃ tadūnaṃ tassa jīvitaṃ.

452. Carato tiṭṭhato vā pi āsīnasayanassa vā,
\nUpeti carimā ratti na te kālo pamajjitu’nti.

Itthaṃ sudaṃ āyasmā sirimando thero gāthāyo abhāsitthā’ti.

Sirimandattheragāthā.

1 Uppajjate-sīmu. 1, 2.
\n2 Icchādhūmāyito-sīmu. 1, 2.
\n3 Niccamattāno-sīmu. 1, 2.
\n4 Virahato-sīmu. 1, 2. Viharate-pa.

[BJT Page 132] [\x 132/]
\n6. 1. 14
\n453. Dipādakoyaṃ asuci duggandho parihīrati,
\nNānākuṇapaparipūro vissavanto tato tato.

454. Migaṃ nilīnaṃ kūṭena baḷiseneva ambujaṃ,
\nVānaraṃ viya lepena bādhayanti puthujjanaṃ.

455. Rūpā saddā rasā gandhā phoṭṭhabbā ca maneramā,
\nPañcakāmaguṇā ete itthi rūpasmiṃ dissare.

456. Ye [PTS Page 048] [\q  48/]      etā upasevanti rattacittā puthujjanā,
\nVaḍḍhenti kaṭasiṃ ghoraṃ anacinanti punabbhavaṃ.

457. Yo cetā1 parivajjeti sappasseva padā siro,
\nSo’maṃ misattikaṃ loke sato samativattati.
\n458. Kāmesvādīnavaṃ disvā nekkhammaṃ daṭṭhu khemato,
\nNissaṭo sabbakāmehi patto me āsavakkhayo’ti.

Itthaṃ sudaṃ āyasmā sabbakāmī thero gāthāyo abhāsitthā’ti.

Sabbakāmittheragāthā.

Tassuddānaṃ:
\nUruvelakassapo ca thero tekicchakāri ca
\nMahānāgo ca kullo ca māluṅkyo2 sappadāsako,
\nKatiyāno migajālo jento sumanasavhayo,
\nNanahātamuni brahmadatto sirimando3 sabbakāmī ca4
\nGāthāyo caturāsīti therā cettha catuddasā’ti.

Chakkanipāto niṭṭhito.

1 Yo vetā-pa, [PTS] Yo cetaṃ-sīmu. 1, 2.
\n2 Māluto-sīmu. 1.
\n3 Sirimaṇḍo-sīmu. 1.
\n4 Sabbakāmīko-[PTS.]
\n 
\n