[PTS Vol S - 2] [\z S /] [\f II /]
[BJT Vol S - 2] [\z S /] [\w II /]
[PTS Page 150] [\q 150/]
\n [BJT Page 234] [\x 234/]

Suttantapiṭake
Saṃyuttanikāyo
Dutiyo bhāgo
Nidānavaggo
2. Dhātusaṃyuttaṃ
2. Sattadhātuvaggo

Namo tassa bhagavato arahato sammāsambuddhassa

 

2. 2. 1.

235. Sāvatthiyaṃ –––

[PTS Page 150] [\q 150/] Sattimā bhikkhave, dhātuyo. Katamā satta? Ābhādhātu, subhadhātu,1 ākāsānaññāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu, imā kho bhikkhave, sattadhātuyo’ti.

Evaṃ vutte aññataro bhikkhu bhagavantaṃ etadavoca: yā cāyaṃ bhante, ābhādhātu, yā ca subhadhātu, yā ca ākāsānañcāyatanadhātu, yā ca viññāṇañcāyatanadhātu, yā ca ākiñcaññāyatanadhātu, yā ca nevasaññānāsaññāyatanadhātu, yā ca saññāvedayitanirodhadhātu, imā nu kho bhante, dhātuyo kiṃ paṭicca paññāyantī’ti?

Yāyaṃ bhikkhu, ābhādhātu, ayaṃ dhātu andhakāraṃ paṭicca paññāyati, yāyaṃ bhikkhu, subhadhātu, ayaṃ dhātu asubhaṃ paṭicca paññāyati, yāyaṃ bhikkhu, ākāsānañcāyatanadhātu, ayaṃ dhātu rūpaṃ paṭicca paññāyati, yāyaṃ bhikkhu, viññāṇañcāyatanadhātu, ayaṃ dhātu ākāsānañcāyatanaṃ paṭicca paññāyati. Yāyaṃ bhikkhu, ākiñcaññāyatanadhātu, ayaṃ dhātuṃ viññāṇañcāyatanaṃ paṭicca paññāyati, yāyaṃ bhikkhu, nevasaññānāsaññāyatanadhātu, ayaṃ dhātu ākiñcaññāyatanaṃ paṭicca paññāyati, yāyaṃ bhikkhu, saññāvedayitanirodhadhātu, ayaṃ dhātu nirodhaṃ paṭicca paññāyatī’ti.

Yā cāyaṃ bhante, ābhādhātu yā ca subhadhātu, yā ca ākāsānañcāyatanadhātu, yā ca viññāṇañcāyatanadhātu, yā ca ākiñcaññāyatanadhātu, yā ca nevasaññānāsaññāyatanadhātu, yā ca saññāvedayitanirodhadhātu, imā nu kho bhante, dhātuyo kathaṃ samāpatti pattabbā’ti?

Ya cāyaṃ bhikkhu, ābhādhātu, yā ca subhadhātu, yā ca ākāsānañcāyatanadhātu, yā ca viññāṇañcāyatanadhātu, yā [PTS Page 151] [\q 151/] ca ākiñcaññāyatanadhātu, imā dhātuyo saññāsamāpatti pattabbā. Yāyaṃ bhikkhu, nevasaññānāsaññāyatanadhātu, ayaṃ dhātu saṃkhārāvasesā samāpatti pattabbā. Yāyaṃ bhikkhu, saññāvedayitanirodhadhātu, ayaṃ dhātu nirodhasamāpatti pattabbāti.

----------------

1. Subhādhātu - bahūsu.

 

[BJT Page 236] [\x 236/]

2. 2. 2.

Sanidānasuttaṃ

236. Sāvatthiyaṃ –––

Sanidānaṃ bhikkhave, uppajjati kāmavitakko no anidānaṃ, sanidānaṃ uppajjati vyāpādavitakko no anidānaṃ, sanidānaṃ uppajjati vihiṃsāvitakko no anidānaṃ.

Katañca bhikkhave, sanidānaṃ uppajjati kāmavitakko no anidānaṃ, sanidānaṃ uppajjati vyāpādavitakko no anidānaṃ, sanidānaṃ uppajjati vihiṃsāvitakko no anidānaṃ?

Kāmadhātuṃ bhikkhave, paṭicca uppajjati kāmasaññā. Kāmasaññaṃ paṭicca uppajjati kāmasaṃkappo. Kāmasaṃkappaṃ paṭicca uppajjati kāmacchando. Kāmacchandaṃ paṭicca uppajjati kāmapariḷāho. Kāmapariḷāhaṃ paṭicca uppajjati kāmapariyesanā. Kāmapariyesanaṃ bhikkhave, pariyesamāno assutavā puphujjano tīhi ṭhānehi micchā paṭipajjati: kāyena vācāya manasā.

Vyāpādadhātuṃ bhikkhave, paṭicca uppajjati vyāpādasaññā. Vyāpādasaññaṃ paṭicca uppajjati vyāpādasaṃkappo. Vyāpādasaṃkappaṃ paṭicca uppajjati vyāpādacchando vyāpādacchandaṃ paṭicca uppajjati vyāpādapariḷāho. Vyāpādapariḷāhaṃ paṭicca uppajjati vyāpādapariyesanā. Vyāpādapariyesanaṃ bhikkhave, pariyesamāno assutavā puthujjano tīhi ṭhānehi micchā paṭipajjati: kāyena vācāya manasā.

Vihiṃsādhātuṃ bhikkhave, paṭicca uppajjati vihiṃsāsaññā. Vihiṃsāsaññaṃ paṭicca uppajjati vihiṃsāsaṃkappo. Vihiṃsāsaṃkappaṃ paṭicca uppajjati vihiṃsāchando. Vihiṃsāchandaṃ paṭicca uppajjati vihiṃsāpariḷāho. Vihiṃsāpariḷāhaṃ paṭicca uppajjati vihiṃsāpariyesanā. Vihiṃsāpariyesanaṃ [PTS Page 152] [\q 152/] bhikkhave, pariyesamāno assutavā puthujjano tīhi ṭhānehi micchā paṭipajjati: kāyena vācāya manasā.

Seyyathāpi bhikkhave, puriso ādittaṃ tīṇukkaṃ sukkhe tiṇadāye nikkhipeyya,1 no ce hatthehi ca pādehi ca khippameva nibbāpeyya, evaṃ hi bhikkhave, ye tiṇakaṭṭhanissitā pāṇā, te anayavyasanaṃ āpajjeyyuṃ.

Evameva kho bhikkhave, yo hi koci samaṇo vā brāhmaṇo vā uppannaṃ visamagataṃ akusalasaññaṃ2 na khippameva pajahati vinodeti byantīkaroti anabhāvaṃ gameti, so diṭṭhe ceva3 dhamme dukkhaṃ viharati savighātaṃ saupāyāsaṃ sapariḷāhaṃ. Kāyassa ca bhedā4 parammaraṇā duggati pāṭikaṅkhā.

Sanidānaṃ bhikkhave, uppajjati nekkhammavitakko no anidānaṃ. Sanidānaṃ uppajjati avyāpādavitakko no anidānaṃ. Sanidānaṃ uppajjati avihiṃsāvitakko no anidānaṃ.

--------------------

1. Nikkhepeyya - syā. 2. Visamagataṃ saññaṃ - machasaṃ, [PTS] 3. Diṭṭheva dhamme - sīmu, syā. 4. Kāyassa bhedā - sīmu, syā.

[BJT Page 238] [\x 238/]

Katañca bhikkhave, sanidānaṃ uppajjati kekkhammavitakko no anidānaṃ, sanidānaṃ uppajjati avyāpādavitakko no anidānaṃ, sanidānaṃ uppajjati avihiṃsāvitakko no anidānaṃ?

Nekkhammadhātuṃ bhikkhave, paṭicca uppajjati nekkhammasaññā. Kekkhammasaññaṃ paṭicca uppajjati nekkhammasaṃkappo. Nekkhammasaṃkappaṃ paṭicca uppajjati nekkhammacchando. Nekkhammacchandaṃ paṭicca uppajjati nekkhakammapariḷāho. Nekkhammapariḷāhaṃ paṭicca uppajjati nekkhammapariyesanā. Nekkhammapariyesanaṃ bhikkhave, pariyesamāno sutavā ariyasāvako tīhi ṭhānehi sammā paṭipajjati: kāyena vācāya manasā.

Avyāpādadhātuṃ bhikkhave, paṭicca uppajjati avyāpādasaññā. Avyāpādasaññaṃ paṭicca uppajjati avyāpādasaṃkappo. Avyāpādasaṃkappaṃ paṭicca uppajjati avyāpādacchando. Avyāpādacchandaṃ paṭicca uppajjati avyāpādapariḷāho. Avyāpādapariḷāhaṃ paṭicca uppajjati avyāpādapariyesanā. Avyāpādapariyesanaṃ bhikkhave, pariyesamāno sutavā ariyasāvako tīhi ṭhānehi sammā paṭipajjati: kāyena vācāya manasā.

Avihiṃsādhātuṃ bhikkhave, paṭicca uppajjati avihiṃsāsaññā. [PTS Page 153] [\q 153/] avihiṃsāsaññaṃ paṭicca uppajjati avihiṃsāsaṃkappo. Avihiṃsāsaṃkappaṃ paṭicca uppajjati avihiṃsācchando. Avihiṃsāchandaṃ paṭicca uppajjati avihiṃsāpariḷāho. Avihiṃsāpariḷāhaṃ paṭicca uppajjati avihiṃsāpariyesanā. Avihiṃsāpariyesanaṃ bhikkhave, pariyesamāno sunavā ariyasāvako tīhi ṭhānehi sammā paṭipajjati: kāyena vācāya manasā.

Seyyathāpi bhikkhave, puriso ādittaṃ tīṇukkaṃ sukkhe tiṇadāye nikkhipeyya, tamenaṃ hatthehi ca pādehi ca khippameva nibbāpeyya, evaṃ hi bhikkhave, ye tiṇakaṭṭhanissitā pāṇā, te na anayavyasanaṃ āpajjeyyuṃ.

Evameva kho bhikkhave, yo hi koci samaṇo vā brāhmaṇo vā uppannaṃ visamagataṃ akusalasaññaṃ khippameva pajahati vinodeti byantīkaroti anabhāvaṃ gameti, so diṭṭhe ceva dhamme sukhaṃ viharati avighātaṃ anupāyāsaṃ apariḷāhaṃ. Kāyassa ca bhedā parammaraṇā sugati pāṭikaṅkhā’ti.

 

2. 2. 3.

Giñjakāvasathasuttaṃ

237. Ekaṃ samayaṃ bhagavā ñātike1 viharati giñjakāvasathe, tatra kho bhagavā bhikkhū āmantesi bhikkhavo’ti. Bhadante’ti te bhikkhū bhagavato paccassosuṃ, bhagavā etadavoca:

Dhātuṃ bhikkhave, paṭicca uppajjati saññā, uppajjati diṭṭhi, uppajjati vitakko’ti.

Evaṃ vutte, āyasmā kaccāno2 bhagavantaṃ etadavoca: "yāyaṃ bhante, diṭṭhi asammāsambuddhesu sammā sambuddhā’ti. Ayaṃ nu kho bhante, diṭṭhi kiṃ paṭicca paññāyatī"ti?

----------------

1. Ñātikehi - [PTS] 2. Saddho kaccāyano-[PTS] Sandho kaccāyano-sī1, 2

[BJT Page 240] [\x 240/]

Mahati kho esā kaccāna, dhātu yadidaṃ avijjādhātu. [PTS Page 154] [\q 154/] hīnaṃ kaccāna, dhātuṃ paṭicca uppajjati hīnā saññā, hīnā diṭṭhi, hīno vitakko, hīnā cetanā, hīnā patthanā, hīno paṇidhi, hīno puggalo, hīnā vācā. Hīnaṃ ācikkhati, deseti, paññapeti, paṭṭhapeti, vivarati, vibhajati, uttānīkaroti. Hīnā tassa uppattī’ti1 vadāmi.

Majjhamaṃ kaccāna, dhātuṃ paṭicca uppajjati majjhamā saññā, majjhamā diṭṭhi, majjhamo vitakko, majjhamā cetanā, majjhamā patthanā, majjhamo paṇidhi, majjhamo puggalo, majjhamā vācā. Majjhamaṃ ācikkhati, deseti, paññapeti, paṭṭhapeti, vivarati, vibhajati, uttānīkaroti. Majjhamātassa uppattī’ti vadāmi.

Paṇītaṃ kaccā,na dhātuṃ paṭicca uppajjati paṇītā saññā, paṇītā diṭṭhi, paṇīto vitakko, paṇītā cetanā, paṇītā patthanā, paṇīto paṇidhi, paṇīto puggalo, paṇītā vācā. Paṇītaṃ ācikkhati, deseti, paññāpeti, paṭṭhapeti, vivarati, vibhajati, uttānīkaroti paṇītā tassa uppattī’ti vadāmī’ti.

 

2. 2. 4.

Hīnādhimuttika suttaṃ

238. Sāvatthiyaṃ –––

Dhātusova3 bhikkhave, sattā saṃsandanti samenti: hīnādhimuttikā sattā hīnādhimuttikehi saddhiṃ saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samenti.

Atītampi3 bhikkhave, addhānaṃ dhātusova sattā saṃsandiṃsu samiṃsu. Hīnādhimuttikā hīnādhimuttikehi saddhiṃ saṃsandiṃsu samiṃsu. Kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu.

Anāgatampi4 bhikkhave, addhānaṃ dhātusova sattā saṃsandissanti samessanti, hīnādhimuttikā hīnādhimuttikehi saddhiṃ saṃsandissanti samessanti. Kalyāṇādhimuttikā kalyāṇādhimuttikehi saddhiṃ saṃsandissanti samessanti.

[PTS Page 155] [\q 155/] etarahi5 bhikkhave, paccuppannaṃ addhānaṃ dhātusova sattā saṃsandanti samenti: hīnādhimuttikā hīnādhimuttikehi saddhiṃ saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samentī’ti.

----------------

1. Uppattiti-machasaṃ, syā 2. Dhātuso-katthaci. 3. Atītampi kho-machasaṃ 4. Anāgatampi kho-machasaṃ. 5. Etarahi kho-machasaṃ.

[BJT Page 242] [\x 242/]

 

2. 2. 5.

Caṅkamasuttaṃ

239. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena āyasmā1 sāriputto sambahulehi bhikkhūhi saddhiṃ bhagavato avidūre caṅkamati. Āyasmā’pi kho mahāmoggallāno sambahulehi bhikkhūhi saddhiṃ bhagavato avidūre caṅkamati. Āyasmā’pi kho mahākassapo sambahulehi bhikkhūhi saddhiṃ bhagavato avidūre caṅkamati. Āyasmā’pi kho anuruddho sambahulehi bhikkhūhi saddhiṃ bhagavato avidūre caṅkamati. Āyasmā’pi kho puṇṇo mantāniputto sambahulehi bhikkhūhi saddhiṃ bhagavato avidūre caṅkamati. Āyasmā’pi kho upāli sambahulehi bhikkhūhi saddhiṃ bhagavato avidūre caṅkamati. Āyasmā’pi kho ānando sambahulehi bhikkhūhi saddhiṃ bhagavato avidūre caṅkamati. Devadatto’pi kho sambahulehi bhikkhūhi saddhiṃ bhagavato avidūre caṅkamati.

Atha kho bhagavā bhikkhū āmantesi: passatha no tumhe bhikkhave, sāriputtaṃ sambahulehi bhikkhūhi saddhiṃ caṅkamantanti? ’Evaṃ bhante’ sabbe kho ete bhikkhave, bhikkhū mahāpaññā.

Passatha no tumhe bhikkhave, moggallānaṃ2 sambahulehi bhikkhūhi saddhiṃ caṅkamantanti? ’Evaṃ bhante’ sabbe kho3 ete bhikkhave, bhikkhū mahiddhikā.

Passatha no tumhe bhikkhave, kassapaṃ4 sambahulehi bhikkhūhi saddhiṃ caṅkamantanti? [PTS Page 156 [\q 156/] ’]evaṃ bhante’ sabbe kho ete bhikkhave, bhikkhū dhutavādā.

Passatha no tumhe bhikkhave, anuruddhaṃ sambahulehi bhikkhūhi saddhiṃ caṅkamantanti? ’Evaṃ bhante’ sabbe kho ete bhikkhave, bhikkhū dibbacakkhukā.

Passatha no bhikkhave, puṇṇaṃ mantāniputtaṃ sambahulehi bhikkhūhi saddhiṃ caṅkamantanti? ’Evaṃ bhante’ sabbe kho ete bhikkhave, bhikkhū dhammakathikā.

Passatha no tumhe bhikkhave, upāliṃ sambahulehi bhikkhūhi saddhiṃ caṅkamantanti? ’Evaṃ bhante’ sabbe kho ete bhikkhave, bhikkhū vinayadharā.

Passatha no tumhe bhikkhave, ānandaṃ sambahulehi bhikkhūhi saddhiṃ caṅkamantanti? ’Evaṃ bhante’ sabbe kho ete bhikkhave, bhikkhū bahussutā.

-----------------

1. Āyasmāpi kho-[PTS] syā, sī 2. 2. Mahāmoggallanaṃ sīmu. 3. Sabbepi kho-sī. 1, 2, [PTS] 4. Mahākassapaṃ - sīmu. 1

[BJT Page 244] [\x 244/]

Passatha no tumhe bhikkhave, devadattaṃ sambahulehi bhikkhūhi saddhiṃ caṅkamantanti? ’Evaṃ bhante’ sabbe kho ete bhikkhave, bhikkhū pāpicchā.

Dhātusova bhikkhave, sattā saṃsandanti samenti: hīnādhimuttikā hīnādhimuttikehi saddhiṃ saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu: hīnādhimuttikā hīnādhimuttikehi saddhiṃ saṃsandiṃsu samiṃsu. Kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti: hīnādhimuttikā hīnādhimuttikehi saddhiṃ saṃsandissanti samessanti. Kalyāṇādhimuttikā kalyāṇādhimuttikehi saddhiṃ saṃsandissanti samessanti.

[PTS Page 157] [\q 157/] etarahi’pi bhikkhave, paccuppannaṃ addhānaṃ dhātusova sattā saṃsandanti samenti: hīnādhimuttikā hinādhimuttikehi saddhiṃ saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samentī’ti.

 

2. 2. 6.

Sagāthasuttaṃ

240. Sāvatthiyaṃ –––

Dhātusova bhikkhave, sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti. Atītampi bhikkhave, addhānaṃ dhātusova sattā saṃsandiṃsu samiṃsu. Hīnādhimuttikā hīnādhimuttikehi saddhiṃ saṃsandiṃsu samiṃsu. Anāgatampi bhikkhave. Addhānaṃ dhātusova sattā saṃsandissanti samessanti: hīnādhimuttikā hīnādhimuttikehi saddhiṃ saṃsandissanti samessanti. Etarahi’pi bhikkhave, paccuppannaṃ addhānaṃ dhātusova sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti.

Seyyathāpi bhikkhave, gūtho gūthena saṃsandati sameti. Muttaṃ muttena saṃsandati sameti. Khelo khelena saṃsandati sameti. Pubbo pubbena saṃsandati sameti. Lohitaṃ lohitena saṃsandati sameti. Evameva kho bhikkhave, dhātusova sattā saṃsandanti samenti: hīnādhimuttikā hīnādhimuttikehi saddhiṃ saṃsandanti samenti. Atītampi bhikkhave, addhānaṃ dhātusova sattā saṃsandiṃsu samiṃsu: hīnādhimuttikā hīnādhimuttikehi saddhiṃ saṃsandiṃsu samiṃsu. Anāgatampi bhikkhave, addhānaṃ dhātusova sattā saṃsandissanti samessanti: hīnādhimuttikā hīnādhimuttikehi saddhiṃ saṃsandissanti samessanti. Etarahi’pi bhikkhave, paccuppannaṃ addhānaṃ dhātusova sattā saṃsandanti samenti:hīnādhimuttikā hīnādhimuttikehi saddhiṃ saṃsandanti samenti.

[BJT Page 246] [\x 246/]

[PTS Page 158] [\q 158/] dhātusova bhikkhave, sattā saṃsandanti samenti: kalyāṇādhimuttikā kalyāṇādhimuttikehi saddhiṃ saṃsandanti samenti, atītampi bhikkhave, addhānaṃ dhātusova sattā saṃsandiṃsu samiṃsu: kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu. Anāgatampi bhikkhave, addhānaṃ dhātusova sattā saṃsandissanti samessanti. Kalyāṇādhimuttikā kalyāṇādhimuttikehi saddhiṃ saṃsandissanti samessanti. Etarahi’pi bhikkhave, paccuppannaṃ addhānaṃ dhātusova sattā saṃsandanti samenti: kalyāṇādhimuttikā kalyāṇādhimuttikehi saddhiṃ saṃsandanti samenti.

Seyyathāpi bhikkhave, khīraṃ khīrena saṃsandati sameti. Telaṃ telena saṃsandati sameti. Sappi sappinā saṃsandati sameti. Madhu madhunā saṃsandati sameti. Phāṇitaṃ phāṇitena saṃsandati sameti. Evameva kho bhikkhave, dhātusova sattā saṃsandanti samenti: kalyāṇādhimuttikā kalyāṇādhimuttikehi saddhiṃ saṃsandanti samenti. Atītampi bhikkhave, addhānaṃ dhātusova sattā saṃsandiṃsu samiṃsu. Anāgatampi bhikkhave, addhānaṃ dhātusova sattā saṃsandissanti samessanti: etarahi’pi bhikkhave, paccuppannaṃ addhānaṃ dhātusova sattā saṃsandanti samenti: kalyāṇādhimuttikā kalyāṇādhimuttikehi saddhiṃ saṃsandanti samenti.

Idamavoca bhagavā, idaṃ vatvā sugato athāparaṃ etadavoca satthā:

Saṃsaggā vanatho jāto asaṃsaggena chijjati,
Parittaṃ dārumāruyha yathā sīde mahaṇṇave
Evaṃ kusītamāgamma sādhu jīvī’pi sīdati,
Tasmā naṃ parivajjeyya kusītaṃ hīnavīriyaṃ,
Pavivittehi ariyehi pahitattehi jhāyihi,
Niccaṃ āraddhaviriyehi paṇḍitehi sahā vase’ti.

 

2. 2. 7.

Assaddhasuttaṃ1

241. [PTS Page 159] [\q 159/] sāvatthiyaṃ –––

Dhātusova bhikkhave, sattā saṃsandanti samenti: assaddhā assaddhehi saddhiṃ saṃsandanti samenti. Ahirikā ahirikehi saddhiṃ saṃsandanti samenti. Anottāpino anottāpīhi2 saddhiṃ saṃsandanti samenti. Appassutā appassutehi saddhiṃ saṃsandanti samenti. Kusītā kusītehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. *

-------------------

1. Assaddha saṃsandana sutta- machasaṃ. 2. Anottappino anottappīhi-machasaṃ.

*. “Saddho saddhehi saddhiṃ saṃsandanti, samenti, hirimanā hirimanehi saddhiṃ saṃsandanti samenti, ottāpino ottāpīhi saddhiṃ saṃsandanti samenti, bahussutā bahussutehi saddhiṃ saṃsandanti samenti, āraddhaviriyā āraddhaviriyehi saddhiṃ saṃsandanti samenti. Upaṭṭhitasatino upaṭṭhita satīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti”. Dissatetrāyamadhiko pāṭho [PTS] potthake

[BJT Page 248] [\x 248/]

Atītampi bhikkhave, addhānaṃ dhātusova sattā saṃsandiṃsu samiṃsu: assaddhā assaddhehi saddhiṃ saṃsandiṃsu samiṃsu. Ahirikā ahirikehi saddhiṃ saṃsandiṃsu samiṃsu. Anottāpino anottāpīhi saddhiṃ saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Kusītā kusītehi saddhiṃ saṃsandiṃsu samiṃsu. Muṭṭhassatino

Muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti: assaddhā assaddhehi saddhiṃ saṃsandissanti samessanti: ahirikā ahirikehi saddhiṃ saṃsandissanti samessanti. Anottapino anottāpīhi saddhiṃ saṃsandissanti samessanti. Appassutā [PTS Page 160] [\q 160/] appassutehi saddhiṃ saṃsandissanti samessanti. Kusītā kusītehi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandissanti samessanti.

Etarahi’pi bhikkhave, paccuppannaṃ addhānaṃ dhātusova sattā saṃsandanti samenti: assaddhā assaddhehi saddhiṃ saṃsandanti samenti. Ahirikā ahirikehi saddhiṃ saṃsandanti samenti. Anottāpino anottāpīhi saddhiṃ saṃsandanti samenti. Appassutā appassutehi saddhiṃ saṃsandanti samenti. Kusītā kusītehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti.

Dhātusova bhikkhave, sattā saṃsandanti samenti: saddhā saddhehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave,addhānaṃ dhātusova sattā saṃsandiṃsu samiṃsu. Saddhā saddhehi saddhiṃ saṃsandiṃsu samiṃsu. Hirimanā hirimanehi saddhiṃ saṃsandiṃsu samiṃsu. Ottāpino ottāpīhi saddhiṃ saṃsandiṃsu samiṃsu. Bahussutā bahussutehi saddhiṃ saṃsandiṃsu samiṃsu. Āraddhaviriyā āraddhaviriyehi saddhiṃ saṃsandiṃsu samiṃsu. Upaṭṭhitasatino upaṭṭhitasatīhi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti: saddhā saddhehi saddhiṃ saṃsandissanti samessanti. Hirimanā hirimanehi saddhiṃ saṃsandissanti samessanti. Ottāpino ottāpīhi saddhiṃ saṃsandissanti samessanti. Bahussutā bahussutehi saddhiṃ saṃsandissanti samessanti. Āraddhaviriyā āraddhaviriyehi saddhiṃ saṃsandissanti samessanti. Upaṭṭhitasatino upaṭṭhitasatīhi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti. Etarahipi bhikkhave, paccuppannaṃ addhānaṃ dhātusova bhikkhave, sattā saṃsandanti samenti: saddhā saddhehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samentī’ti.

 

2. 2. 8.

Assaddhamūlakatikapañcakasuttaṃ

242. Sāvatthiyaṃ –––

Dhātusova bhikkhave, sattā saṃsandanti samenti: [PTS Page 161] [\q 161/] assaddhā assaddhehi saddhiṃ saṃsandanti samenti. Ahirikā ahirikehi saddhiṃ (saṃsandanti samenti.) Duppaññā duppaññehi saddhiṃ (saṃsandanti samenti.) Saddhā saddhehi saddhiṃ (saṃsandanti samenti.) Hirimanā hirimanehi saddhiṃ (saṃsandanti samenti.) Paññavanto paññavantehi saddhiṃ saṃsandanti samenti. [BJT Page 250] [\x 250/]

Atītampi bhikkhave, addhānaṃ dhātusova sattā saṃsandiṃsu samiṃsu: assaddhā assaddhehi saddhiṃ saṃsandiṃsu samiṃsu. Ahirikā ahirikehi saddhiṃ saṃsandiṃsu samiṃsu. Anottāpino anottāpīhi saddhiṃ saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Kusītā kusītehi saddhiṃ saṃsandiṃsu samiṃsu. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti: assaddhā assaddhehi saddhiṃ saṃsandissanti samessanti: ahirikā ahirikehi saddhiṃ saṃsandissanti samessanti. Anottapino anottāpīhi saddhiṃ saṃsandissanti samessanti. Appassutā appassutehi saddhiṃ saṃsandissanti samessanti. Kusītā kusītehi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti: assaddhā assaddhehi saddhiṃ saṃsandanti samenti. Ahirikā ahirikehi saddhiṃ saṃsandanti samenti. Anottāpino anottāpīhi saddhiṃ saṃsandanti samenti. Appassutā appassutehi saddhiṃ saṃsandanti samenti. Kusītā kusītehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Paṭhamattikaṃ.)

Dhātusova bhikkhave, sattā saṃsandanti samenti: assaddhā assaddhehi saddhiṃ saṃsandanti samenti. Anottāpino anottāpīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu: assaddhā assaddhehi saddhiṃ saṃsandiṃsu samiṃsu. Anottāpino anottāpīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Saddhā saddhehi saddhiṃ saṃsandiṃsu samiṃsu. Ottāpino ottāpīhi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti: assaddhā assaddhehi saddhiṃ saṃsandissanti samessanti. Anottāpino anottāpīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Saddhā saddhehi saddhiṃ saṃsandissanti samessanti. Ottāpino ottāpīhi saddhiṃ saṃsandissanti samessanti. Paññavanto paññavantehi saddhiṃ saṃsandissanti, samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti: assaddhā assaddhehi saddhiṃ saṃsandanti samenti. Anottāpino anottāpīhi saddhiṃ saṃsandanti samenti duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Hirimanā hirimanehi

Saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Dutiyattikaṃ.)

Dhātusova bhikkhave, sattā saṃsandanti samenti: assaddhā assaddhehi saddhiṃ saṃsandanti samenti. Appassutā appassutehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu: assaddhā assaddhehi saddhiṃ saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Saddhā saddhehi saddhiṃ saṃsandiṃsu samiṃsu. Bahussutā bahussutehi saddhiṃ saṃsandiṃsu samiṃsu. Paññāvanto paññāvantehi saddhiṃ saṃsandiṃsu samiṃsu.

[PTS Page 162] [\q 162/] anāgatampi bhikkhave, addhānaṃ dhātusova sattā saṃsandissanti samessanti: assaddhā assaddhehi saddhiṃ saṃsandissanti samessanti. Appassutā appassutehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Saddhā saddhehi saddhiṃ saṃsandissanti samessanti. Bahussutā bahussutehi saddhiṃ saṃsandissanti samessanti. Paññāvanto paññāvantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti: assaddhā assaddhehi saddhiṃ saṃsandanti samenti. Appassutā appassutehi saddhiṃ samenti. Kusītā kusītehi saddhiṃ saṃsandanti samenti. Saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Paññāvanto paññāvantehi saddhiṃ saṃsandanti samenti. ( Tatiyattikaṃ)

(Dhātusova bhikkhave, sattā saṃsandanti samenti:) assaddhā assaddhehi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave addhānaṃ dhātusova sattā saṃsandiṃsu samiṃsu: assaddhā assaddhehi saddhiṃ saṃsandiṃsu samiṃsu. Kusītā kusītehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Saddhā saddhehi saddhiṃ saṃsandiṃsu samiṃsu. Āraddhaviriyā āraddhaviriyehi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave addhānaṃ assaddhā assaddhehi saddhiṃ saṃsandissanti samessanti. Kusītā kusītehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Saddhā saddhehi saddhiṃ saṃsandissanti samessanti. Āraddhaviriyā āraddhaviriyehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave paccuppannaṃ addhānaṃ dhātusova sattā saṃsandanti samenti: assaddhā assaddhehi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandantīti samenti. (Catutthattikaṃ. )

[BJT Page 252] [\x 252/]

Dhātusova bhikkhave, sattā saṃsandanti samenti. Assaddhā assaddhehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Uppaṭiṭhitasatino uppaṭiṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Assaddhā assaddhehi saddhiṃ saṃsandiṃsu samiṃsu. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Saddhā saddhehi saddhiṃ saṃsandiṃsu samiṃsu. Upaṭṭhitasatino upaṭṭhitasatīhi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti. Assaddhā assaddhehi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Saddhā saddhehi saddhiṃ saṃsandissanti samessanti. Upaṭṭhitasatino upaṭṭhitasatīhi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Assaddhā assaddhe saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Saddhā saddhehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samentī’ti. (Pañcamattikaṃ)

 

2. 2. 9.

Ahirikamūlakatikacatukkasuttaṃ

243. Sāvatthiyaṃ –––

Dhātusova bhikkhave, sattā saṃsandanti samenti: ahirikā ahirikehi saddhiṃ saṃsandanti samenti. Anottāpino anottāpīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Ahirikā ahirikehi saddhiṃ saṃsandiṃsu samiṃsu. Anottāpino [PTS Page 163] [\q 163/] anottāpīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave addhānaṃ dhātusova sattā saṃsandissanti samessanti. Ahirikā ahirikehi saddhiṃ saṃsandissanti samessanti. Anottāpino anottāpīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Ahirikā ahirikehi saddhiṃ saṃsandanti samenti. Anottāpino anottāpīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Paṭhamattikaṃ)

Dhātusova bhikkhave, sattā saṃsandanti samenti. Ahirikā ahirikehi saddhiṃ saṃsandanti samenti. Appassutā appassutehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu, ahirikā ahirikehi saddhiṃ saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Hirimanā hirimanehi saddhiṃ saṃsandiṃsu samiṃsu. Bahussutā bahussutehi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti, ahirikā ahirikehi saddhiṃ saṃsandissanti samessanti. Appassutā appassutehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Hirimanā hirimanehi saddhiṃ saṃsandissanti samessanti. Bahussutā bahussutehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti, ahirikā ahirike saddhiṃ saṃsandanti samenti. Appassutā appassutehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Dutiyattikaṃ. )

Dhātusova bhikkhave, sattā saṃsandanti samenti. Ahirikā ahirikehi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu, ahirikā ahirikehi saddhiṃ saṃsandiṃsu samiṃsu. Kusītā kusītehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Hirimanā hirimanehi saddhiṃ saṃsandiṃsu samiṃsu. Āraddhaviriyā āraddhaviriyehi saddhiṃ saṃsandiṃsu samiṃsu. Paññavanto

Paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti, ahirikā ahirikehi saddhiṃ saṃsandissanti samessanti. Kusītā kusītehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Hirimanā hirimanehi saddhiṃ saṃsandissanti samessanti. Āraddhaviriyā āraddhaviriyehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti, ahirikā ahirike saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Tatiyattikaṃ.)

[BJT Page 254] [\x 254/]

Dhātusova bhikkhave, sattā saṃsandanti samenti. Ahirikā ahirikehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu, ahirikā ahirikehi saddhiṃ saṃsandiṃsu samiṃsu. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Hirimanā hirimanehi saddhiṃ saṃsandiṃsu samiṃsu. Upaṭṭhitasatino upaṭṭhitasatīhi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti, ahirikā ahirikehi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Hirimanā hirimanehi saddhiṃ saṃsandissanti samessanti. Upaṭṭhitasatino upaṭṭhitasatīhi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti, ahirikā ahirike saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Hirimanā hirimanehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Catutthattikaṃ.)

 

2. 2. 10.

Anottāpamūlakatikattayasuttaṃ

244. Sāvatthiyaṃ –––

[PTS Page 164] [\q 164/]

Dhātusova bhikkhave, sattā saṃsandanti samenti, anottāpino anottāpīhi saddhiṃ saṃsandanti samenti. Appassutā appassutehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Anottāpino anottāpīhi saddhiṃ saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Ottāpino ottāpīhi saddhiṃ saṃsandiṃsu samiṃsu. Bahussutā bahussutehi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti. Anottāpino anottāpīhi saddhiṃ saṃsandissanti samessanti. Appassutā appassutehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Ottāpino ottāpīhi saddhiṃ saṃsandissanti samessanti. Bahussutā bahussutehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Anottāpino anottāpīhi saddhiṃ saṃsandanti samenti. Appassutā appassutehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Paṭhamattikaṃ.)

Dhātusova bhikkhave, sattā saṃsandanti samenti, anottāpino anottāpīhi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Anottāpino anottāpīhi saddhiṃ saṃsandiṃsu samiṃsu. Kusītā kusītehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Ottāpino ottāpīhi saddhiṃ saṃsandiṃsu samiṃsu. Āraddhaviriyā āraddhaviriyehi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti. Anottāpino anottāpīhi saddhiṃ saṃsandissanti samessanti. Kusītā kusītehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Ottāpino ottāpīhi saddhiṃ saṃsandissanti samessanti. Āraddhaviriyā āraddhaviriyehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Anottāpino anottāpīhi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Dutiyattikaṃ.)

Dhātusova bhikkhave, sattā saṃsandanti samenti, anottāpino anottāpīhi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Anottāpino anottāpīhi saddhiṃ saṃsandiṃsu samiṃsu. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Ottāpino ottāpīhi saddhiṃ saṃsandiṃsu samiṃsu. Upaṭṭhitasatino upaṭṭhitasatīhi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti. Anottāpino anottāpīhi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Ottāpino ottāpīhi saddhiṃ saṃsandissanti samessanti. Upaṭṭhitasatino upaṭṭhitasatīhi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Anottāpino anottāpīhi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Ottāpino ottāpīhi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Tatiyattikaṃ.)

[BJT Page 256] [\x 256/]

 

2. 2. 11.

Appassutamūlakatikadvayasuttaṃ

245. Sāvatthiyaṃ –––

Dhātusova bhikkhave, sattā saṃsandanti samenti, appassutā appassutehi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Āraddhaviriyā [PTS Page 165] [\q 165/] āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Kusītā kusītehi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Bahussutā bahussutehi saddhiṃ saṃsandiṃsu samiṃsu. Āraddhaviriyā āraddhaviriyehi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti. Appassutā appassutehi saddhiṃ saṃsandissanti samessanti. Kusītā kusītehi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Bahussutā bahussutehi saddhiṃ saṃsandissanti samessanti. Āraddhaviriyā āraddhaviriyehi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Appassutā appassutehi saddhiṃ saṃsandanti samenti. Kusītā kusītehi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Paṭhamattikaṃ.)

Dhātusova bhikkhave, sattā saṃsandanti samenti, appassutā appassutehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave, addhānaṃ dhātusova sattā saṃsandiṃsu samiṃsu. Appassutā appassutehi saddhiṃ saṃsandiṃsu samiṃsu. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Bahussutā bahussutehi saddhiṃ saṃsandiṃsu samiṃsu. Upaṭṭhitasatino upaṭṭhitasatīhi saddhiṃ saṃsandiṃsu samiṃsu. Paññavanto paññavantehi saddhiṃ saṃsandiṃsu samiṃsu.

Anāgatampi bhikkhave, addhānaṃ dhātusova sattā saṃsandissanti samessanti. Appassutā appassutehi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Bahussutā bahussutehi saddhiṃ saṃsandissanti samessanti. Upaṭṭhitasatino upaṭṭhitasatīhi saddhiṃ saṃsandissanti samessanti. Paññavanto paññavantehi saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti. Appassutā appassutehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Bahussutā bahussutehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti. (Dutiyattikaṃ.)

 

2. 2. 12.

Kusītamūlakatikekasuttaṃ

246. Sāvatthiyaṃ –––

Dhātusova bhikkhave, sattā saṃsandanti samenti: kusītā kusītehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Atītampi bhikkhave addhānaṃ dhātusova sattā saṃsandiṃsu samiṃsu: kusītā kusītehi saddhiṃ saṃsandiṃsu samiṃsu. Muṭṭhassatino muṭṭhassatīhi saddhiṃ saṃsandiṃsu samiṃsu. Duppaññā duppaññehi saddhiṃ saṃsandiṃsu samiṃsu. Āraddhaviriyā āraddhaviriyehi saddhiṃ saṃsandiṃsu samiṃsu. Upaṭṭhitasatino upaṭṭhitasatīhi saddhiṃ saṃsandiṃsu samiṃsu. Paññavanto paññavantehi saddhiṃ saddhiṃ saṃsandiṃsu samiṃsu.

Anāgatampi bhikkhave addhānaṃ dhātusova sattā saṃsandissanti samessanti: kusītā kusītehi saddhiṃ saṃsandissanti samessanti. Muṭṭhassatino muṭṭhassatīhi saddhiṃ saṃsandissanti samessanti. Duppaññā duppaññehi saddhiṃ saṃsandissanti samessanti. Āraddhaviriyā āraddhaviriyehi saddhiṃ saṃsandissanti samessanti. Upaṭṭhitasatino upaṭṭhitasatīhi saddhiṃ saṃsandissanti samessanti. Paññavanto paññavantehi

Saddhiṃ saṃsandissanti samessanti.

Etarahipi bhikkhave, paccuppannaṃ addhānaṃ dhātusova sattā saṃsandanti samenti: kusītā kusītehi saddhiṃ saṃsandanti samenti. Muṭṭhassatino muṭṭhassatīhi saddhiṃ saṃsandanti samenti. Duppaññā duppaññehi saddhiṃ saṃsandanti samenti. Āraddhaviriyā āraddhaviriyehi saddhiṃ saṃsandanti samenti. Upaṭṭhitasatino upaṭṭhitasatīhi saddhiṃ saṃsandanti samenti. Paññavanto paññavantehi saddhiṃ saṃsandanti samenti.

Sattadhātuvaggo dutiyo.

Tatruddānaṃ:

Sattadhātu sanidānaṃ giñjakāvasathena ca,
Hīnādhimutti caṅkamaṃ sagāthāssaddha1 sattamaṃ.
[PTS Page 166] [\q 166/] assaddhamūlakā pañca cattāri ahirikamūlakā,
Anottāpamūlakā tīṇi duve appassutena ca
Kusītaṃ ekakaṃ vuttaṃ suttantā tīṇi pañcakāti.

--------------------

Sagāthañcāti. Sīmu.