[PTS Vol S - 1] [\z S /] [\f I /]
\n [PTS Page 236] [\q 236/]
\n [BJT Vol S - 1] [\z S /] [\w I/]
\n [BJT Page 422. [\x 422/] ]

Suttantapiṭake
Saṃyuttanikāyo
Paṭhamo bhāgo
Sagāthavaggo
11. Sakkasaṃyuttaṃ
3. Sakkapañcakaṃ

Namo tassa bhagavato arahato sammāsambuddhassa.

 

11. 3. 1.

Jhatvā1suttaṃ

267. 2Evaṃ me sutaṃ: ekaṃ samayaṃ bhagavā [PTS Page 237] [\q 237/] sāvatthiyaṃ viharati jetavane anāthapiṇḍikassa ārāme. Atha kho sakko devānamindo yena bhagavā tenupasaṅkami. Upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho sakko devānamindo bhagavantaṃ gāthāya ajjhabhāsi:

Kiṃsu jhatvā3 sukhaṃ seti kiṃsu jhatvā3 na socati,
Kissassa4 ekadhammassa vadhaṃ rocesi gotamāti.

(Bhagavā:)

Kodhaṃ jhatvā3 sukhaṃ seti kodhaṃ jhatvā3 na socati,
Kodhassa visamūlassa madhuraggassa vāsava,
Vadhaṃ ariyā pasaṃsanti taṃ hi jhatvā3 na socatī ti.

 

11. 3. 2.

Dubbaṇṇiyasuttaṃ

268. Sāvatthiyaṃ ––– 5

Bhūtapubbaṃ bhikkhave, aññataro yakkho dubbaṇṇo okoṭimako sakkassa devānamindassa āsane nisinno ahosi. Tatra sudaṃ bhikkhave devā tāvatiṃsā ujjhāyanti khīyanti vipācenti: acchariyaṃ vata bho, abbhūtaṃ vata bho, ayaṃ yakkho dubbaṇṇo okoṭimako sakkassa devānamindassa āsane nisinnoti. 6 Yathā yathā kho bhikkhave, devā tāvatiṃsā ujjhāyanti khīyanti vipācenti, tathā tathā so yakkho abhirūpataro ceva hoti dassanīyataro ca pāsādikataro ca.

Atha kho bhikkhave devā tāvatiṃsā yena sakko devānamindo tenupasaṅkamiṃsu. Upasaṅkamitvā sakkaṃ devānamindaṃ etadavocuṃ: idha te mārisa aññataro yakkho dubbaṇṇo okoṭimako tumhākaṃ7 āsane nisinno. Tatra sudaṃ mārisa devā tāvatiṃsā ujjhāyanti khīyanti vipācenti: acchariyaṃ vata bho abbhūtaṃ vata bho ayaṃ yakkho dubbaṇṇo okoṭimako [PTS Page 238] [\q 238/] sakkassa devānamindassa āsane nisinnoti. Yathā yathā kho mārisa devā tāvatiṃsā ujjhāyanti khīyanti vipācenti, tathā tathā so yakkho abhirūpataro ceva hoti dassanīyataro ca pāsādikataro cāti. So hi nūna mārisā kodhabhakkho yakkho bhavissatī ti.

1. Chetvā suttaṃ-machasaṃ. [PTS] 2. Sāvatthiyaṃ jetavane-machasaṃ 3. Chetvā-machasaṃ [PTS] 4. Kissassu-machasaṃ. 5. Sāvatthiyaṃ jetavane. Tatra kho -pe etadavoca-machasaṃ. 6. Nisinno hoti. [PTS] 7. Sakkassa devānamindassa-machasaṃ.

[BJT Page 424] [\x 424/]

Atha kho bhikkhave, sakko devānamindo yena so kodhabhakkho yakkho tenupasaṅkami. Upasaṅkamitvā ekaṃsaṃ uttarāsaṅgaṃ karitvā dakkhiṇajāṇumaṇḍalaṃ paṭhaviyaṃ nihantvā yena so kodhabhakkho yakkho tenañjaliṃ paṇāmetvā tikkhattuṃ nāmaṃ sāvesi sakko’haṃ1 mārisa devānamindo, sakko’haṃ2 mārisa devānamindoti.

Yathā yathā kho bhikkhave, sakko devānamindo nāmaṃ sāveti, tathā tathā so yakkho dubbaṇṇataro ceva ahosi okoṭimakataro ca. Dubbaṇṇataro ceva hutvā okoṭimakataro ca tatthevantaradhāyīti.

Atha kho bhikkhave sakko devānamindo sake āsane nisīditvā deve tāvatiṃse anunayamāno tāyaṃ velāyaṃ imā gāthāyo abhāsi.

Na sūpahatacitto’mhi nāvattena3 suvānayo,
Na vo cirāhaṃ kujhāmi kodho mayi nāvatiṭṭhati.
Kuddho’haṃ4 pharusaṃ brūmi na ca dhammāni kittaye,
Sanniggaṇhāmi attānaṃ sampassaṃ atthamattanoti.

 

11. 3. 3.

Māyāsuttaṃ5

269, Sāvatthiyaṃ6 –––

Bhūtapubbaṃ bhikkhave, vepacitti asurindo ābādhiko ahosi, dukkhito bāḷhagilāno. Atha kho bhikkhavo, sakko devānamindo yena vepacitti asurindo tenupasaṅkami gilānapucchako.

Addasā kho bhikkhave, vepacitti asurindo sakkaṃ devānamindaṃ dūrato’va āgacchantaṃ. Disvāna sakkaṃ devānamindaṃ etadavoca: tikiccha maṃ devānamindāti.

[PTS Page 239] [\q 239/]

Vācehi maṃ vepacitti sambarīmāyanti. Na tāvāhaṃ vācemi yāvāhaṃ mārisa asure paṭipucchāmīti,

Atha kho bhikkhave vepacitti asurindo asure paṭipucchi: vācemahaṃ mārisā sakkaṃ devānamindaṃ sambarīmāyanti. Mā kho tvaṃ mārisa vācesi sakkaṃ devānamindaṃ sambarīmāyanti.

Atha kho bhikkhave vepacitti asurindo sakkaṃ devānamindaṃ gāthāya ajjhabhāsi:

Māyāvī7 maghavā sakka devarājā8 sujampati,
Upeti nirayaṃ ghoraṃ sambaro’va sataṃ samanti.

1. Sāveti-sīmu, machasaṃ. Syā 2. Sakkāhaṃ-syā 3. Nāvaṭṭena -syā [PTS] 4. Kuddhāhaṃ na pharusaṃ brūmi-machasaṃ. Syā. [PTS] 5. Sambarimāyā suttaṃ-machasaṃ 6. Sāvatthiyaṃ -pe - bhagavā etadavoca -machasaṃ 7. Māyāvi-[PTS] 8. Devarāja -machasaṃ.

[BJT Page 426. [\x 426/] ]

 

11. 3. 4

Accayasuttaṃ

270. 1Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena dve bhikkhū sampayojesuṃ. Tatreko bhikkhu accasarā. Atha kho so bhikkhu tassa bhikkhuno santike accayaṃ accayato deseti2. So bhikkhu na paṭigaṇhāti. 3

Atha kho sambahulā bhikkhū yena bhagavā tenupasaṅkamiṃsu. Upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ: idha bhante dve bhikkhū sampayojesuṃ. Tatreko bhikkhu accasarā. Atha kho so bhante bhikkhu tassa bhikkhuno santike accayaṃ accayato deseti. So bhikkhu na paṭigaṇhātīti.

Dve me bhikkhave bālā: yo ca accayaṃ accayato na passati, yo ca accayaṃ desentassa yathādhammaṃ na paṭigaṇhāti. Ime kho bhikkhave, dve bālā. Dve me bhikkhave paṇḍitā: yo ca accayaṃ accayato passati, yo ca accayaṃ desentassa yathādhammaṃ paṭigaṇhāti. Ime kho bhikkhave dve paṇḍitā,

Bhūtapubbaṃ bhikkhave sakko devānamindo sudhammāyaṃ sabhāyaṃ deve tāvatiṃse anunayamāno tāyaṃ velāyaṃ imaṃ gāthā abhāsi.

[PTS Page 240] [\q 240/]

Kodho vo vasamāyātu mā ca mitte hi vo jarā,
Agarahiyaṃ mā garahittha mā ca bhāsittha pesuṇaṃ,
Atha pāpajanaṃ kodho pabbato cābhimaddatīti,

 

11. 3. 5

Akkodhasuttaṃ

271. Evaṃ me sutaṃ: ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena4 kho pana samayena dve bhikkhū sampayojesuṃ. Tatreko bhikkhu accasarā. Atha kho so bhikkhu tassa bhikkhuno santike accayaṃ accayato deseti. So bhikkhu na paṭigaṇhāti.

Atha kho sambahulā bhikkhū yena bhagavā tenupasaṅkamiṃsu. Upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ: idha bhante dve bhikkhū sampayojesuṃ. Tatreko bhikkhu accasarā. Atha kho so bhante bhikkhu tassa bhikkhuno santike accayaṃ accayato deseti. So bhikkhu na paṭigaṇhātīti.

Dve me bhikkhave bālā: yo ca accayaṃ accayato na passati, yo ca accayaṃ desentassa yathādhammaṃ na paṭigaṇhāti. Ime kho bhikkhave, dve bālā. Dve me bhikkhave paṇḍitā: yo ca accayaṃ accayato passati, yo ca accayaṃ desentassa yathādhammaṃ paṭigaṇhāti. Ime kho bhikkhave dve paṇḍitā,

Bhūtapubbaṃ bhikkhave sakko devānamindo sudhammāyaṃ sabhāyaṃ deve tāvatiṃse anunayamāno tāyaṃ loyaṃ imaṃ gāthaṃ abhāsi.

Mā vo kodho ajjhabhavi mā ca kujjhittha kujjhanaṃ,
Akkodho avihiṃsā ca ariyesu vasati sadā5
Atha pāpajanaṃ kodho pabbato vābhimaddatīti.

Sakkapañcakaṃ.

1. Sāvatthiyaṃ-pe- ārāme -machasaṃ. 2. Desesi-[PTS] 3. Nappaṭiggaṇhāti -machasaṃ. Na paṭiggaṇhāti-syā 4. Tatra kho bhagavā -pe - etadavoca -machasaṃ syā. [PTS] 5. Ariyesu ca paṭipadā-machasaṃ.

[BJT Page 428] [\x 428/]

Tatruddānaṃ:

Jhatvā dubbaṇṇiya māyā accayena akodhano,
Desitaṃ buddhaseṭṭhena idaṃ hi sakkapañcakanti.
Sakkasaṃyuttaṃ samattaṃ.

Devatā devaputto ca rājā māro ca bhikkhunī,
Brahmā brāhmaṇa vaṅgīso vana yakkhena vāsavoti.

Sagāthavaggo niṭṭhito.